Эргэ Табаҕа сайдар кэскилэ түстэннэ

Бу остуолба бөһүөлэк баай историятын кэпсиир «Ямщицкое подворье» бырайыак олоххо киирэригэр сүҥкэн суолталаах. Ол курдук,  былыргы дьаам суолун Дьокуускайтан 25-с км 1743 сыллаахха манна почта ыстаансыйата тэриллибитэ биллэр. Оттон бүгүн ыраахтааҕылаах Арассыыйа дьаам сүүрдээччилэрин сыдьааннара манна  Дьокуускай куорат төрүттэммитэ 400 сылын көрсө этнокултуурунай  комплексы төрүттүүр ыра санаалара олоххо киирэр аналланна. Бу бырайыак, бииринэн, билигин «Искра» култуура киинигэр кыбыллан олорор ураты хайысхалаах музейы "быыһыыр"; иккиһинэн,  Өлүөнэ күргэтин тутуунан күрдьүллэр дьылҕаламмыт былыргы тутуулары көһөрөн аҕалан, кэлэр көлүөнэлэргэ бэлэх уунар кыаҕы биэрэр. Ол курдук, муостаны тутааччылар олохтоохтор көҕүлээһиннэрин өйөөтүлэр, диэн куорат баһылыга Дмитрий Садовников биллэрэр.