Табаҕа «култуурунай» кыһалҕалара

Ол курдук, Дьокуускай куорат Табаҕатыгар икки култуура тэрилтэтэ үлэлиир —  «Искра» Култуура киинэ уонна Оҕо искусствотын оскуолата.

«Искра» Култуура киинэ Эргэ Табаҕаҕа 1972 сыллааҕы тутуу эргэ дьиэҕэ үлэлиир. Эбийиэк сүрүн кыһалҕата — уораана. Салалта бу кыһалҕанан үһүс сылын «Култуура» нацбырайыакка хапытаалынай өрөмүөн туруорсар сайаапка биэрэр эбит да, ситиһии суох. Оттон бу Култуура дьиэтэ бэйэтин баазатыгар «Ямщицкое подворье «25 верста» диэн бэртээхэй этно-комплексы тэрийэр былааннаах. Бырайыагын номнуо бэлэмнээбиттэр эрээри... бас билэр сирэ суох.

Бэҕэһээ бу уонна атын боппуруостарынан Табаҕаҕа куорат дьокутааттарын кытта туһааннаах структуралар бэрэстэбиитэллэрэ тахса сырыттылар. Ол курдук, сир боппуруоһугар Куораты тутууга уонна архитектураҕа департамент салайааччыта Иван Гуляев быһаарбытынан, куорат соҕурууҥҥу чааһын маастар-былаана оҥоһулла сылдьар эбит. Ол, биир үксүн, Өлүөнэ күргэтин тутууну кытта ситимнээҕэ саарбахтаммат. Холобура, Өлүөнэ күргэтэ тутулларыгар чуолаан Эргэ Табаҕа инфраструктуратыгар кэккэ уларыйыылар киирэллэрэ сабаҕаланар. Онон табаҕалар ыраланар этно-комплекстарын сирэ бу маастар-былаан бигэргэтилиннэҕинэ эрэ быһаарыллар чинчилээх. Куорат Култуураҕа управлениета бу боппуруоһу болҕомтоҕо тута сылдьар, табылыннаҕына, өрөспүүбүлүкэ уонна дойду таһымнаах граннарга кыттар былаан баарын ыйда.

Оҕо искусствотын оскуолатын дьиэтигэр эрдэ хапытаалынай өрөмүөн ыытыллан, бүгүҥҥү кыһалҕалара — штаты кэҥэтии, музыкальнай инструменнары саҥардыы уонна саҥа сценаны оҥоруу. Култуура управлениетын начаалынньыга Сардана Брызгалова бэлиэтээбитинэн, штаты кэҥэтии боппуруоһа көрүллэр сылдьар эбит. Оттон сценаны олохтоох көҕүлээһиннэри өйүүр (ППМИ) бырагыраама көмөтүнэн тутарга сүбэлээтилэр. Музыкальнай инструменнарынан хааччыйыы боппуруоһунан култуура министиэристибэтин нөҥүө дьокутаат Валерий Федоров дьарыктанарыгар көрдөстүлэр.

Мунньах кыттыылаахтара маны таһынан Табаҕа орто оскуолатыгар сырыттылар. Оскуола кэлэктиибэ хас дас суол кыһалҕаны бэлиэтээтэ — спорт саалата, гараас уонна учууталлар олорор дьиэлэрэ. Спорт саалалара оскуолаттан тэйиччи турар эргэ, биллэн турар, тымныы дьиэҕэ үлэлиирэ хайа да өттүнэн табыгаһа суох. Учууталлар улахан аҥаардара куораттан сылдьан үлэлииллэрэ эмиэ үөрэх хаачыстыбатын доҕолоҥнотуон сөп. Кэпсэтии кыттыылаахтара Үөрэх управлениета 2027 сыл бүддьүөтүгэр оскуола гарааһыгар үп көрөрүн, учууталлар, бүддьүөт атын да үлэһиттэрэ дьиэлэнэллэригэр сир боппуруоһун быһаарар туһунан түмүк ылыннылар.

Санатар буоллахха, көһө сылдьар мунньахха Дьокуускай куорат дууматын Айаан Васильев салайааччылаах үөрэхтээһиҥҥэ, култуураҕа уонна оҕо сааска сис кэмитиэтэ,  СӨ норуодунай дьокутаата Валерий Федоров, куорат баһылыгын солбуйааччы Владимир Аржаков итиэннэ Олохтоох дьаһалта салааларын салайааччылара кыттыыны ыллылар. Бу туһунан Куорат дууматын пресс-сулууспата иһитиннэрэр.