ЭРЭҺИИНЭ САППЫКЫ. Хайдах талабыт, төһөҕө булабыт?

Матырыйаала

Билиҥҥи уу саппыкылара былыргы курдук дьиҥнээх эрэһиинэттэн оҥоһуллубут буолбуттара ыраатта. Эрэһиинэни аныгы матырыйаалларынан солбуйаллар:

• ПВХ ( (поливинилхлорид) — сахалар “доширак саппыкы” диэн сүрэхтээбиппит быданнаата. Үчүгэйэ диэн ыйааһына чэпчэки, бөҕө-таҕа, онно-манна тоҕута тардыллыбат, реагеннартан куттаммат. Ол эрэн тымныыга кытаатар, хайыта тэбиллиэн сөп, сылааһы туппат, халтараан.
• ЭВА (этиленвинилацетат) — эмиэ полимер, ол эрэн тутула күүгэннээх, салгын быысаһыылаах оҥоһуллар буолан сылааһы тутар. Сымнаҕас, токуруйумтуо, тымныыга дөйө тоҥмот. Ол эрэн тэстиэн, хайыта барыан сөп. Уллуҥа үксүн эмиэ ЭВА буолар – халтараан.
• Каучук — саамай бөҕө матырыйаал, тымныыны тулуйумтуо, уунаҥнас, ууттан бэркэ харыстыыр, ол эрэн атахпыт олох "тыыммат".

Маны тэҥэ комбиированнай саппыкылар баар буолаллар – ПВХ уонна ЭВА холбоммута, сотото таҥас буолуон сөп.

Кээмэйэ уонна олоруута

Эрэһиинэ саппыкы кэтилиннэҕинэ кэҥээбэт, ол иһин чопчу кээмэйинэн ылыллыахтаах. 1-1,5 см саппаастаах буолуохтаах, оччоҕуна саппыкы уонна атаххыт икки ардыгар салгын хаалан, сылааһы тутарыгар үчүгэй. Оттон сайыҥҥы саппыкы саппааһа 3-4 мм буолара сөп.

Кээмэйдииргитигэр атаххыт холкутук киирэрин-тахсарын көрүҥ. Ханнык баҕарар атах таҥаһын, ол иһигэр саппыкыны эмиэ, эбиэт кэннэ эбэтэр киэһэлик атах дарбайбытын кэннэ атыылаһар ордук.

Уллуҥа

• Саппыкы уллуҥа бөҕө уонна токуруйумтуо буолуохтаах, устунан атах форматын ылыахтаах.
• Кэтит буолуохтаах – атах ноҕоруускатын биир тэҥник тарҕатар.
• Халыҥ буолуохтаах – оллур-боллур сиргэ үктэнэргэ биллэрбэт, сылааһы тутар.
• Протектордаах буолуохтаах – халтарыйбат.

Дьокуускайга билиҥҥи сыана

Киин куораппытыгар бэҕэһээ өлгөм уулаах ардах кэлэн ааспытыгар бары саппыкыбытын хостоотубут, чугаһаттыбыт.

Дьокуускайга атыыга баар саппыкылары үөрэтэн көрдүбүт. Уола/кыыһа диэн арахсыбакка кэтиллэр моһуоннаахтар атыыга элбэхтэр эбит. Оҕо саппыкытын сыаната улахан киһи киэниттэн улаханнык араастаспат.

Саппыкы билиҥҥи сыаната маннык буолбут:

• "Столичнай ырыынакка" – 1000 солк. саҕаланар.
• Кытайтан табаар аҕалар байердарга (күнүнэн аҕалан биэрэллэр) – 1500-2000 солк.
• “Инсдустрия спецодежда” маҕаһыыҥҥа – 900 солк. саҕаланар.
• “Хозмаркет” – 990-2000 солк.
• "Вилберристан" сакаастаан ыларга – 1100 солк. саҕалаан бааллар.
• “Кари” чэпчэки атах таҥастаах маҕаһыыҥҥа – 1299 солк. саҕалаан. Оҕо киэнэ – 799 солк. саҕаланар.