Эрдэттэн толкуйдааҥ

Быйыл бэс ыйын 24 күнүгэр нуучча тылын көмүскүүр ис хоһоонноох 168 №-дээх федеральнай сокуон ылыллыбыта. Онно олоҕуран, омук тылынан үлүһүйүү эһиил кулун тутар 1 күнүттэн тохтуо.

О.э., туох баар ыйанар вывеска, ыйынньык, табличка нууччалыы тылынан буолуохтаах, ону таһынан Арассыыйа норуоттарын тылынан хатыламмыт буолуон сөбө этиллэр. Рекламаҕа омук тылларын, этиилэрин туһаныы хааччахтаныа. Саҥа тутуллар олорор дьиэ комплекстарын аатыгар кириллицанан суруйуу эрэ көҥүллэниэ. Арай фирма аата, табаар уонна хааччыйыы бэлиэлэрэ эрэ омуктуу буолуон сөп. Госдуума бэрэссэдээтэлэ В. Володин кэлэр сылы күүтэн олорбокко, омуктуу ааттары суруйууну тохтоторго ыҥырбыт. Краснодар, Ярославль, Магнитогорскай курдук куораттары холобурдаабыт. Тас дойдуттан кэлэн биисинэс арынааччылар  нуучча тылын уонна култууратын ытыктыахтаахтарын бэлиэтээбит.

Дьокуускайга эмиэ омуктуу тылынан ааттаммыт маҕаһыын, вывеска да дэлэй. Онон саҥа тэрилтэ, маҕаһыын арынааччылар, эһиил тиийэн  уларыта сатаабат курдук, толкуйданыҥ. Ону тэҥэ Сахабыт тылын атарахсытарбыт ончу табыллыбат. Аҕыйах ахсааннаах омук буоларбытын өйдөөн-санаан туран, нуучча тылын сэргэ төрөөбүт ийэ тылбытын өрө тутар, тэнитэр эбээһинэстээхпитин умнумуоҕуҥ.