Эр дьон прогимназията: гостиница, маҕаһыын, түмэл?

Баһылык Дмитрий Садовников Дьокуускай куорат 400 сылын көрсө бу дьиэҕэ музей оҥорорго этиилээх. Ол туһунан кини Култуура нэһилиэстибэтин харыстыыр управление салайааччыта Николай Макаровы кытта кэпсэттэ.

Санатар буоллахха, Саха сиринээҕи эр дьон прогимназиятынан биллэр былыргы архитектура пааматынньыга муниципальнай бас билиигэ киирэн турар. Араас сылларга манна гостиницаттан саҕалаан эргиэн дьиэтигэр тиийэ тэрийэргэ этиилэр бааллара. Дмитрий Садовников, идэтинэн историк буоларын да быһыытынан, манна музейтан атын тэриллэрэ сатамматын уонна ону куорат 400 сыллаах үбүлүөйүгэр бэлэх уунары туруорсар. «Тапталлаах куораппыт килбэйэр киинигэр маннык баай нэһилиэстибэ мөлтөх туруктаах турара сатаммат», – диэн кини санаатын үллэстэр.