Эн соҕотох буолбатаххын...

Аатыгар да баарын курдук, бу хантан да үбүлэммэт, үтүө санаалаахтар көмөлөрүнэн, өйөбүллэринэн 3 сыл үлэлээн кэлбит уопсастыбаннай тэрилтэни Томарико Дьячковская биир санаалаахтарын кытта төрүттээбитэ. Кини идэтинэн юрист. Билигин сууттарга бэрэстэбиитэл быһыытынан кыттарын, “Технопарка” резиденэ буоларын бэлиэтээбиттэр.

Кыргыттар дьоҥҥо туһалаах бырайыактарын, хата, олоччу сабар санаалара суох эбит. Анал саайтан көрдөххө, кинилэр тэрилтэлэрэ (НКО) юридическай сирэй быһыытынан 2025 сыл ыам ыйыгар регистрацияламмыт. Роликтарыгар: “Икки аҥаар сыл биллибэккэ ааста. Страницабытыгар 7000 тахса сурутааччыланныбыт. Араас бэстибээллэри, дьаарбаҥкалары, сүүһүнэн босхо юридическай, психологическай сүбэлэри ыыттардыбыт, туһалаах маастар-кылаастары, социальнай роликтары оҥордубут. Тэрилтэбит ирдэнэр нолуоктара төлөнөн турар. Биһиги уопуппутун салҕаан, судургута суох эрээри, наадалаах, үтүө дьыаланы үлэлэтэр дьиҥ баҕалаах дьону көрдүүбүт”, – диэбиттэр.

Уустук балаһыанньаҕа түбэспит, оҕолоох, көмөҕө наадыйар дьахталлары граннаах уонна судаарыстыбаттан өйөнөр “Саха Азия оҕолоро” Пуондаҕа баралларыгар сүбэлээбиттэр. Бэйэлэрэ хаста да граҥҥа анньыһан көрбүттэр да, хомойуох иһин, өйөммөтөхтөр.

Оттон түмсүүлэрэ (сообщество) салгыы үлэлиэҕин, ол эрээри кэккэ уларыйыы киириэҕин эппиттэр. Пабликтарыгар: “Биир история бүттэҕинэ, иккис саҕаланар үгэстээх” ­­­–­ диэбиттэр. Мантан да салгыы сырдатар, дьахталлары уонна кыргыттары түмэр санаалаахтарын үллэстибиттэр.

Быһата, олоххор уустук да баар буоллаҕына, эн соҕотох буолбатаххын, үтүө санаалаах дьон баарын бу кыргыттар холобурдара туоһулуур.