Эмискэ холуоһаҕа олоруу эбэтэр 5 сылга да чэпчэтии үчүгэй буолбатах дуо?

Бэнсиин диписиит буолбутугар сорохтор гааһынан барар массыыналаахтары, төһө да кинилэргэ эмиэ уһун уочарат көстөрүн да иһин, ымсыыра, ордугуу санаан ылаллара суох буолбатах этэ. Дьэ ити гынан баран, гаас уматыкка көһөрбүт сорох дьоҥҥо нолуокка чэпчэтиилэрэ тохтоон, эмискэ «бабат!» диир түгэннэрэ үүммүт.

Билбэт дьоҥҥо билиһиннэрэр буоллахха, судаарыстыба тырааныспары бэнсиинтэн гаас уматыкка көһөрүүнү көҕүлүүр, өйүүр. Гаас-мотуор уматыга бэнсиинтэн удамыр сыаналааҕын, экологоияҕа охсуута суоҕун бэлиэтиир. Кырдьык да, оннук. Арай дэлби тэбэр түгэннэрэ баара сэрэхэдитэр.

Өйдүүргүт буолуо, 2020 сылтан саҕалаан гааска көстөххө, тырааныспар нолуогар бүтүн 50%-наах чэпчэтии көрүллэрин туһунан кэпсээн үллэҥнэтии буолбута.

Кырдьык, бастакынан кэриэтэ көһөрбүттэр биэс сыл оннук чэпчэтиилээх төлөһөн кэллилэр.

Оттон бу кэлбит нолуок квитанциятыгар ол тырааныспардарын нолуога икки бүк кыырайан тахсыбыттар бааллар. Холобур, бу иннинэ төлөспүт 16 800 солк. оннугар 33 тыһ 600 солк. ууран биэрдэҕинэ табыллар буолбут киһи баар эбит.

Онтон соһуйан ыйыталаспыта, 2024 сыл бүтүүтэ Ил Тумэн  «Нолуок бэлиитикэтин туһунан» сокуоҥҥа гаас уматыкка көһөрбүт кэмтэн саҕалаан 5 көлө нолуогар чэпчэтии киирэр диэҥҥэ уларытан, чопчулаан биэрбиттэр үһү. Кини саамай абарара, ити сокуоҥҥа киирбит көннөрүү ол сокуон киириэн иннигэр гааска көһөрбүттэргэ эмиэ дьайар гыммыттар. Кини бастайааннай өрүккэ чэпчэтии баар буолуо дии санаабыт.

Ону баара, кэрэ кэм хаһан эрэ бүтэрин, сайын күһүнүнэн солбулларын тэҥэ, өйөбүл да көрүллүүтэ бүтээхтиир буоллаҕа. Буолан баран, билиҥҥи курдук бүддьүөт үбэ кырыымчык кэмигэр.

Итинтэн сиэттэрэн, сорохтор ГБО олордубуттарын кэмсинэр чинчилээхтэр.

Дьиҥинэн, биэс сыл устата син кырата суохтук экэниэмийэлээтэхтэрэ. Ол да өйөбүл эбээт. Эһиги туох дии саныыгыт?

Манна даҕатан эттэххэ, бу дьыл муус устарыгар бырамыысыланнас миниистирин э. т. соцситимнэргэ эппитинэн, Саха сиригэр 20 тыһ. тахса легковой уонна таһаҕас тиэйэр массыына итинник уматыкка көспүт этэ.

Ол курдук, сыччах   2025 сыл устата 904 техника гаас уматыкка киирбитин, оттон бу сыл бастакы кыбаарталыгар 143 көлө көспүтүн бэлиэтээбитэ.

Ол кэмҥэ Дьокуускай пассажирдары таһар 551 автобуһа гааһынан барара таарыйбыта. Саҥа кэлэр автобустар эмиэ метанынан бараллар.

Санаабычча...

Эһиил муниципальнай оптуобустарга анаан, анал заправка тутуллуохтааҕын иһитиннэрэн турабыт. Сигэтэ👉 https://kiinkuorat.ru/articles/gaa-ynan-sapyraapkalyyr-ystaansyya-tutulluo-a Онон гаас уматыгы куттар уочарат аҕыйыа диэн суоттаналлар. Ону тэҥэ гаас бэлэмин улаатыннарар сорук турар. 

Онон түмүккэ гаас уматыкка көһүү барыстаах дуу, бэнсиининэн сылдьыбыт көнө дуу диэн ыйытыы үөскүүр.