Эмчит идэтигэр 750 устудьуон тус сыаллаах үөрэххэ киирбит

Саха сиригэр мэдиссиинэ каадырын бэлэмнээн таһаарыыга тус сыаллаах үөрэххэ ылыы тыын суолталаах, көмөлөөх хайысхалартан биирдэстэрэ. Үс өрүттээх дуогабарга олоҕуран, үөрэҕи бүтэрэн исписэлиис буолбут дьон салгыы өрөспүүбүлүкэ улуустарыгар уонна куораттарыгар үлэлии бараллар. Бу үөрэҕин бүтэрээччигэ да, үлэһиккэ наадыйааччыга да олус табыгастаах дьаһаныы.

Ол курдук,  специалитет бырагырааматыгар – 275 ординатураҕа – 91, оттон эмчит орто үөрэҕин биэрэр үөрэх кыһаларыгар – 392 киһи үөрэнэ киирбит.

Быйыл специалитет бырагырааматыгар уопсайа 285 тус сыаллаах миэстэ көрүллүбүт. ХИФУ институтугар былааннаммыт 190 миэстэттэн 184-дэ туолбут, оттон киин сир үрдүк үөрэҕин кыһаларыгар 95 миэстэ баарыттан 91-э туттуллубут. Мантан көрдөххө, хаарыан тус сыаллаах 10 миэстэ туттуллубакка хаалбыт курдук. Дьиҥинэн, эмчит үрдүк үөрэҕэр туттарсыан баҕалаах аҕыйаҕа суох да, итинник эмиэ буолар эбит.

Ординатураҕа быйыл тус сыаллаах 169 миэстэ көрүллүбүт. Итинтэн ХИФУга 87 миэстэ бэриллибититтэн 68 туһаныллыбыт. Оттон киин сир үрдүк үөрэҕин кыһаларыгар бүтүн 81 миэстэ баарыгар 23 миэстэтигэр дуогабар түһэрсиллибит. Бу эмиэ – туһугар толкуйдатар чахчы.

Доруобуйа харыстабылын миниистирэ Лена Афанасьева: «Тус сыаллаах үөрэтии биһиэхэ өрөспүүбүлүкэ доруобуйа харыстабылыгар үлэлиир каадыр эрэсиэрбэтин бэлэмниирбитигэр төһүү кыаҕы биэрэр. Биһиги бэлэм, үөрэхтээх каадыр ахсаанын сыччах элбэтэр туһугар эрэ буолбакка, эдэр быраастар уонна эмп салаатын исписэлиистэрэ үөрэх, билии ылан баран, төрөөбүт-үөскээбит Сахаларын сиригэр төннөн, өрөспүүбүлүкэ эмтиир тэрилтэлэригэр үлэлииллэригэр интэриэстээхпит. Ол иһин исписэлиис буола үүнэн тахсыахтаах дьону үөрэххэ туттарсар кэмнэриттэн саҕалаан, үөрэххэ туттарсар кэмнэригэр уонна кинилэри үлэ миэстэтинэн хааччыйыыга тиийэ арыаллыыр суолталаах».

Өрөспүүбүлүкэ бүддьүөтүттэн тус сыаллаах үөрэтиигэ көрүллүбүт үп суотугар орто анал үөрэҕи биэрэр үөрэх кыһаларыгар быйыл 392 устудьуон киирбит. Ол эбэтэр, өрөспүүбүлүкэ эмчит идэлээхтэри бэлэмнээн таһаарыыга биир дьоһун суолтаны уурар. Ити курдук тус сыаллаах үөрэтии бырагыраамата үрдүк да, орто идэлээх да исписэлиистэри бэлэмнииргэ үлэлиир.

Мантан сиэттэрэн, эһиил үөрэҕи бүтэрэр, эрдэ бүтэрбит эрээри саҥардыы үөрэххэ туттарсар баҕалаах дьон тус сыаллаах үөрэтии баарын билэллэрэ, хара ааныттан, ол эбэтэр олох сааскыттан саҕалаан туһааннаах иһитиннэриилэри билэ-көрө сатыыллара туһалыа.

Тыа сиригэр быраас тиийбэт кыһалҕата суох буолбатах. Бэл, сорох куоракка, улуус кииннэригэр кытта чопчу хайысхалаах быраас, биэлсэр тиийбэтэ баар суол. Холобур, биир кырата суох улууска ыйга 500 тыһ. солк. тиийэ хамнаһы төлүүргэ мэктиэлээн даҕаны, соторутааҕыга диэри идэтийбит хируру була иликтэрэ. Хоту улуустар тустарынан этэ да барыллыбат.

Маннык түгэҥҥэ быраас идэтигэр үөрэнэргэ тус сыаллаах миэстэ көрүллэрэ, каадыр эрэсиэрбэтин бэлэмнииргэ тиһиктээх үлэ барар буолбута үөрдэр, эрэли саҕар.