Элбэх оҕолоохторго 960 сир учаастага бэрилиннэ

Олунньу 12, 13, 19 уонна 20 күннэригэр Олохтоох дьаһалта Сир сыһыаннаһыыларыгар агентствота элбэх оҕолоохторго сир учаастактарын түҥэтиини ыытта. 
Ол иһигэр олунньу 20 күнүгэр ыҥырыллыбыт 150 киһиттэн 92 киһи кэлэн, Бүлүүлүүр суол 16, 17 км учаастактары ыллылар.
Ааспыт 2024 сылга Бүлүүлүүр суолга сир учаастагын ылыыга уопсайа 1618 киһи ыҥырыллан, 960 сир бэриллибит, 5 киһи аккаастаммыт. Онон Бүлүүлүүр тракка оҥоһуллубут сирдэри биэрии түмүктэннэ.
Олунньу 25, 26 күннэригэр аны Киллэмҥэ уонна Табаҕаҕа оҥоһуллубут учаастактары тыырыы былааннанар. Санатар буоллахха, сэрэбиэй «Сир сыһыаннаһыыларыгар агентство» дьиэтигэр сарсыарда 09-00 чаастан күнүс 12-00 чааска диэри ыытыллар: Октябрьскай уул., 20/1, 3 этээс (303 каб.)., диэн иһитиннэрэр Олохтоох дьаһалта пресс-сулууспата.
Бэлиэтээн эттэххэ, 2023 сылтан элбэх оҕолоохтор сир учаастагын оннугар 200 тыһ. солк. кээмэйдээх биир кэмнээх харчынан төлөбүрү ылар бырааптаахтар. Сокуон күүһүгэр киириэҕиттэн өйөбүл бу ньыматынан Дьокуускай куоракка 753 ыал туһаммыт. Оттон быйылгыттан босхо сир учаастагын оннугар олохтоммут харчынан төлөбүр кээмэйин 300 тыһ. солк. диэри үрдэтэр туһунан боппуруос көрүллэр.