Элбэх оҕолоохторго 1 мөл. солк. төлүүр көҕүлээһини бүтүн Уһук Илин эрэгийиэнигэр тарҕатыыга этии киирдэ

Бу этии кулун тутар 23 күнүгэр Госдуумаҕа “Элбэх оҕолоох дьиэ кэргэттэргэ социальнай өйөбүл миэрэлэрин туһунан” 63 №-дээх РФ Бэрэсидьиэнин ыйааҕын олоххо киллэриигэ аналлаах истиилэр кэмигэр иһилиннэ. СӨ Ил Түмэнигэр киллэриллибит көҕүлээһини Уһук Илин уонна Арктика сайдыытын кэмитиэтин бэрэссэдээтэлэ  Николай Харитонов эттэ.

Үһүс эбэтэр онтон кэлэр оҕо төрөөтөҕүнэ 1 мөлүйүөн солкуобай төлөбүрү көрөр пилотнай бырайыагы Уһук Илиҥҥи федеральнай уокурукка киирэр бары эрэгийиэннэргэ тарҕатыы туһунан этии буолар. Ол сыалтан Уһук Илиҥҥи федеральнай уокурукка киирэр эрэгийиэннэргэ федеральнай субсидияны биэрэр быраабылаларга уларытыылары киллэрэн, ипотеканы төлөөһүҥҥэ судаарыстыбаннай өйөбүл сууматын 450 000-тан 1 мөлүйүөн солкуобайга диэри улаатыннарыы этиллэр.