Элбэх оҕолоохтор сир учаастагын оннугар харчынан төлөбүр ылыахтарын сөп

Үс уонна онтон элбэх оҕолоохтор сир учаастагын оннугар харчынан төлөбүрү ылыахтарын сөп. 2025 сылга СӨ Бырабыыталыстыбатын 67 №-дээх уурааҕынан бу төлөбүр кээмэйэ 300 тыһ. солк. диэри улааппыта (27.02.2025).
Төлөбүрү Үлэ уонна социальнай сайдыы министиэристибэтин иһинэн Нэһилиэнньэ дьарыктаах буолуутугар уонна социальнай харалтаҕа управление оҥорор. Сир учаастагын оннугар харчынан биир кэмнээх төлөбүрү ыларга «Мои документы» (ГАУ «МФЦ в РС(Я)») эбэтэр e-yakutia.ru портал нөҥүө сайабылыанньа биэриэххэ наада. Сайабылыанньа уһаабыта 10 үлэ күнүн иһинэн көрүллэр. 
Төлөбүрү туһанар хайысхалар:
- дьиэ-уот усулуобуйатын тупсарыы уонна өрөмүөн;
- олорор дьиэни гаас, уу, уот ситимигэр холботуу, онуоха аналлаах оборудованиены атыылаһыы;
- ИЖС сир учаастагын атыылаһыы;
- тырааныспар атыылаһарга (уу мотуора, снегоход, массыына, матассыыкыл, квадроцикл, снегоболотоход);
- оҕону үөрэхтииргэ (төлөбүрдээх үөрэххэ, уопсай дьиэ төлөбүрүгэр), маныаха сайабылыанньа бэриллэр кэмигэр оҕо 23 сааһын ааһыа суохтаах;
- медицинскэй көмөнү оҥорууга (дьиэ кэргэн бары чилиэннэригэр, ол иһигэр оҕо 28 сааһын ааһыа суохтаах);
- кэтэх хаһаайыстыбаны сайыннарыыга, ол иһигэр тыа хаһаайыстыбатын тиэхиньикэтин, сылгы, ынах, коза, таба, сибиинньэ о.д.а. атыылаһыыга.
Бу туһунан «Сир сыһыаннаһыыларыгар агентство» МХТ иһитиннэрэр.