Элбэх оҕолоох ыалларга өйөбүл оҥоһуллар

Өрөспүүбүлүкэ Ил Дарханын 2024 сыл муус устар 26 күнүнээҕи 300 №-дээх ыйааҕын олоххо киллэрии чэрчитинэн Дьокуускай куоракка үс уонна онтон элбэх оҕолоох ыалларга социальнай өйөбүл эбии миэрэлэрин быһыытынан оҕолор куорат оптуобустарынан, муниципальнай музейдарга босхо сылдьыылара, оскуолаҕа итии аһылыгынан босхо хааччыллыылара тэриллэн турар.

Чуолаан, оскуола үөрэнээччилэрэ үөрэх дьылын устата уопсастыбаннай тырааныспарынан босхо 96 төгүл айанныыр кыахтаахтар.

Дойду баһылыга Владимир Путин дьаһалынан 1-4 кылаастарга үөрэнэр 22 393 кырачаан бары «Үөрэхтээһин» нацбырайыак иитинэн итии аһылыгынан хааччыллаллар. Дьокуускай куорат Олохтоох дьаһалтатын бирикээһинэн олохтоох бүддьүөттэн элбэх оҕолоох ыаллар оҕолоро, доруобуйаларынан хааччахтаах оҕолор, анал байыаннай дьайыы кыттыылаахтарын, атын даҕаны социальнай араҥа оҕолоро босхо итии аһылыгынан хааччыллаллар.

Социальнай өйөбүл бу көрүҥүнэн Дьокуускай куоракка 5-11 кылаастарга үөрэнэр 19 тыһыынчаттан тахса оҕо туһанар: элбэх оҕолоохтор оҕолоро – 11 841, кыаммат араҥа оҕолоро – 2 890, анал байыаннай дьайыы кыттыылаахтарын оҕолоро – 1 753, доруобуйаларынан хааччахтаах оҕолор – 1 724, диэн Олохтоох дьаһалта пресс-сулууспата иһитиннэрэр.