Элбэх оҕолоох ыалларга сир учаастактарын түҥэттилэр

Дьокуускайга балаҕан ыйын 10-12 күннэригэр элбэх оҕолоох дьиэ кэргэттэргэ Намсыыр суолугар турар сир учаастактарын түҥэтии ыытылынна.

Бу сырыыга 450 гражданин ыҥырыллыбытыттан 305 киһи кэлбит. Ол курдук, тэрээһин түмүгүнэн 294 учаастак түҥэтиллибит, 11 ыал бэйэтэ аккаастаммыт.

Олохтоох дьаһалта пресс-сулууспата иһитиннэрбитинэн, Намсыыр суолугар сир учаастактарын үллэриигэ барыта 1317 киһи ыҥырыллыбыт, онтон 600-һэ (45%) кытта кэлбит.  Сэрэбиэй тардыы түмүгүнэн 579 учаастак (уопсай ахсаантан 57%) элбэх оҕолоох дьиэ кэргэттэргэ тиэрдиллибит, 21 ыал бэйэтэ аккаастаммыт. Манна даҕатан эттэххэ, сир учаастагын ыларга уочаракка турар гражданин, сөбүлэспэт түгэнигэр, учаастактан бэйэтэ үстэ аккаастанар бырааптаах.    

Санатан эттэххэ, сир учаастактарын түҥэтии туһунан биллэрии (ыҥырыллар дьон испииһэктэрин кытта) Дьокуускай куорат дьаһалтатын yakutskcity.ru сайтыгар тахсар.  

Хаартыска: «Киин куорат» хаһыат архыыбыттан