Элбэх оҕолоох дьиэ кэргэттэр учаастактарын ИЖС-ка көһөрүөхтэрин сөп

Дьокуускай куорат элбэх оҕолоох дьиэ кэргэттэрэ Бүлүүлүүр суол 16-с килэмиэтиригэр уонна Намцыыр суолун 8-с килэмиэтиригэр ылбыт учаастактарын чааһынай дьиэни туттууга (ИЖС) көһөрөр кыахтаннылар. Бу туһунан куорат дьаһалтатын МАХ ханаалыгар ыам ыйын 14 күнүгэр иһитиннэрдилэр.

Учаастактары нэһилиэнньэлээх пууннар кыраныыссаларыгар киллэрдилэр, урут ылылларыгар оҕуруот аһын үүннэриигэ анаммыттара. Дьаһалта бэлиэтииринэн, уларыйыылар дьиэ кэргэн олорор уонна сайдар усулуобуйаларын тупсарыахтара.

Учаастагы үс уонна онтон элбэх оҕолоох дьиэ кэргэттэр ылыахтарын сөп, ол эрээри уочарат улахан буолан, маныаха хас да сыл ааһыан сөп. Уочараты кэтэһиэхтэрин баҕарбат ыалга 300 тыһыынча солкуобай суумалаах төлөбүрү учаастак оннугар биэрэллэр. 2026 сыл кулун тутарыгар Дьокуускай баһылыга Евгений Григорьев төлөбүрү 500 тыһыынча солкуобайга диэри улаатыннарарга этии киллэрбитэ.

Былырыын, 2025 сылга, элбэх оҕолоохторго Бүлүүлүүр суолга — 964, Намцыыр суолугар 1014 учаастагы биэрбиттэр.