Эл Иэнэ: «Өссө ыарахан кэмнэр кэлиэхтэрэ. Саха сирэ онно бэлэмэ суох...»

Иистэн – төрүччүгэ

Дьиҥэр, кини эйгэлээҕэ оҕо эрдэҕиттэн биллэр этэ.

– Сарсын туох күн буоларын илэ түһүүрүм. Биһиэхэ ким кэлиэхтээҕин, массыыната хайдаҕын, күн-дьыл туругун эндэппэккэ билэрим. Ийэм: «Ону-маны кэпсээмэ!» – диэн боборо, буойара. Баҕар, ол иһин хараҕым баайыллан хаалбыта буолуо.

Эдэр сырыттахпына биир сайын Залогка баар эргэ баҕайы дьиэни харабыллаан олор диэн биэрбиттэрэ. Куттамматым да бэрт, сөбүлэспитим. Дьиэ ортотугар эргэ баҕайы сиэркилэ турара. Таҥаһынан бүөлээн кэбис эҥин дииллэрэ. Онно арыллан саҕалаабыт буолуохпун сөп. Ону-маны элбэҕи түһүүр этим. Ол эрээри үлэ, үөрэх үөһүгэр сылдьан улаханнык аахайбатаҕым быһыылааҕа, – диэн сэргэх сэһэргэһээччим кэпсэтиибитин саҕалаата.

Алена кыра эрдэҕиттэн иискэ сыстан улааппыта. Аан бастаан ийэтин сорудаҕынан аҕатын хара ыстааныгар кыһыл тимэх тикпитин субу баардыы өйдүүр. 13 сааһыттан хайыы үйэ сакаас ылар буолбута. Ол да иһин өр сыл бэриниилээхтик үлэлээбит госсулууспатыттан уурайан барарыгар, уһуну-киэҥи толкуйдаабакка, бииргэ төрөөбүт кыра балтын кытта дьоҕус ательены арыйбыттара. Салгыы сайдан, «Алена модиста» диэн иис оскуолатын үлэлэппитэ. Ити эйгэҕэ төһө уһуннук айа-тута сылдьыа биллибэт этэ... Арай аан дойдуну атыйахтыы аймаабыт пандемия саҕаламмытыгар, туох барыта сабыллан, хааччах, хаайтарыы буолбута. Ити кэмтэн бииртэн биир билии кутуллан киирбитэ.

– Онлайн даҕаны дьарыктаа дии сатаабыттара ээ. Мин иискэ оннук үөрэх барсыбат дии саныыбын. Хас сииги барытын көрүөхтээх, бэрэбиэркэлиэхтээх буоллаҕым. Онон, хата, ити кэмҥэ ийэм өттүнэн төрүччүбүн үөрэтэн барбытым. Эһэбит хаалларбыт летопиһыттан сирдэтэн, эдьиийдэрбит, убайдарбыт көмөлөрүнэн улахан матырыйаалы мунньан, архыыпка биэрбиппит.

Эттэтии. Үөрэх. Билии

Аны ол кэмҥэ охсор ыарыы охсорун курдук дьикти туруктана, төбөтө эрэ хамсыыр буола сылдьыбыта. Хаанын баттааһына үрдүүрэ, уҥан хаалара, өйүн сүтэрэрэ. Суһал көмөнөн балыыһаҕа киирэрэ, онтон төттөрү ыытан кэбиһэллэрэ. Хааман иһэн мэйиитэ эргийэн охтон түһэрэ, ол сылдьан хаста даҕаны атаҕын силгэтин быспыта. Ыксаан, иискэ дьарыктыыр кыргыттарын дьыбааҥҥа сытан үөрэппиттээх. Ол бүтэһик кууруһун нэһиилэ түмүктээбитэ уонна оскуолатын сабарга күһэллибитэ.

Ол саҕана Орхон, Енисей руналара диэни улаханнык билбэтэ ээ. Дьиктитэ баар, эмискэ баҕайы руна суруктара, бэлиэлэрэ илэ кэлэр курдук буолбуттара. Уһуйааччыта Көстөкүүн бөлөҕөр киирэн, руна суруктарын үөрэтэн барбыта. Дьэ, онтон саҕалаан чараас эйгэ баарын билбитэ – хараҕа арыллыбыта, кулгааҕа чуор буолбута, сыты ылар дьоҕура сайдыбыта. Ытык алгысчыт Афанасий Федоров-Охонооһой, Сыдьаайа, Байдам Филипповтар уһуйааннарыгар үөрэммитэ. Ону таһынан кыра-кыралаан элбэх билиини ылбыта.

Үс сыл анараа өттүгэр НАСМП (Национальная ассоциация специалистов метафизических практик) бэрэстэбиитэллэрэ Саха сиригэр кэлэн, «Битва экстрасенсов» курдук тургутуулары ыыппыттар, көмпүүтэринэн энергияларын, турукка хайдах киирэллэрин бэрэбиэркэлээбиттэр. Онтон ыла ити ассоциацияҕа исписэлиис быһыытынан сылдьар. Былырыын балаҕан ыйыгар «Метафизика. Аристотель» диэн мэтээлинэн наҕараадаламмыта.

Сорохтор үһүс харахтара номнуо аһыллан баран кэлэллэр

Эл Иэнэ арчылыыр, алгыстыыр, ыраастыыр, чараас эйгэҕэ саҥа киирэ сатыыр дьоҥҥо күүс-көмө буолар, бэйэлэрин суолларын булалларыгар сирдьит, уһуйааччы быһыытынан үлэлиир.

– Баҕалааҕы барытын ылбаппын. Бастаан төлөпүөнүнэн кэпсэтэбин, онтон сүбэ-ама биэрэргэ ыҥырабын. Онно сөп түбэһэр буоллахтарына биирдэ уһуйабын. Бастаан кэлбит дьон ис санааларын истэбин, туруктарын, онно хайдах киирэллэрин, эттэрин-сииннэрин төһө билэллэрин көрөбүн, баҕар, олох да бүтэй киһи кэлбитэ буолуо. Биир киһини кытта 6 эҥин чаас кэпсэтиэхпин сөп. Санаа күүһүнэн үлэ барар. Онно барыта тахсан кэлэр.

Үөрэх бастаан харыстаныыттан саҕаланар. Салгыы ыраастаныы, арчыланыы кэнниттэн нэҥири кытта үлэ саҕаланар. Онтон илии күүһүн тургутабыт.

Наһаа күүстээх, ол эрээри бэйэлэрин суолларын-иистэрин булуммакка, булкулла-тэккиллэ сылдьар кыргыттар бааллар. Сорохтор үһүс харахтара, төбөлөрүн оройо номнуо аһыллан баран эбэтэр ситэри арыллыбакка кэлэллэр. «Түүлбэр дүҥүр тыаһын истэбин», «Үрдүбэр ким эрэ күүскэ баҕайы тыынар» дииллэр, аанньа утуйбакка эрэйдэнэллэр. Олус ыксаан, бэл, психиатр көмөтүгэр наадыйар туруктаах буолаллар. Ити күүстээх нэҥирдэрэ истэригэр хааллан, ону сатаан таһаарбаттарыттан оннукка тиийэллэр. Мин онуоха нэҥирдэрин тэҥнииргэ көмөлөһөбүн. Тоҕо диэтэххэ нэҥириҥ төбөҥ оройуттан атаҕыҥ төбөтүгэр диэри тэбис-тэҥ, кэлимсэ буолуохтаах, ойбонноруҥ (чакраларыҥ) эмиэ. Ити кэргэннээх, оҕолордоох кыргыттарга ордук сэрэхтээх. Тоҕо диэтэххэ биһиги хас биирдии чугас киһибитин кытта нэҥиринэн бэриллэр ситимнээхпит (нууччалыыта “энергетическая нить”). Бастатан туран, уоскуйуллуохтаах, «арыллан эрэбин» диэн санаанан, эйгэнэн эрэ сылдьыбакка, сирдээҕи олох баарын умнуллуо суохтаах.

Кэтээн көрдөххө, эйгэҕэ кэлбит киһи олоҕуттан сирдээҕи дьон көҕүрээн хаалаллар. Анаан-минээн тэйбэтэҕиҥ, тэйиппэтэҕиҥ да иһин оннук. Ити ыраастааһын. Бу туһунан үөрэх аайы кэпсииллэр.

Аны туран, өбүгэттэн кэлбити ылыммат буоллаххына, эйиэхэ охсуулаах буолуон сөп. «Кини уйар, уйуохтаах» диэн талан ыыттахтара.

Сорохтор холкутук ылыналлар. Эрдэттэн үөрэнэн киирэн бараллар. Холобур, алгыска үөрэнэн, итэҕэлгэ кэлэллэр, сиэри-туому үөрэтэллэр, ыраастаныы, харыстаныы туһунан элбэҕи билэллэр.

Эн этэргинии, сиидэлэнии диэн син биир баар. Уһуйааҥҥа аналларын билэ кэлэллэр. Манна биири этэхпин баҕарабын: тута көрбүөччү, эмчит буолан хаалбаккын. Ити үтүмэн үлэни эрэйэр. Сороҕор биир киһиэхэ элбэх сатабыл бэриллэр – ким эрэ көрбүөччү, алгысчыт, иис-уус да буолуон сөп. Онно барытыгар сыраҕын-сылбаҕын бараабакка, биири таларыҥ ордук.

Хаһан да туолбат чороон

– Хас биирдии уһуйааччы атын-атын көрүүлээх. Бэйэҕиттэн элбэҕи билэр киһиэхэ үөрэнэ сатыахтааххын. Итэҕэл диэн «иитэ аҕал» диэн. Киһи көрбүтүн-истибитин бэйэтигэр иитэр, иҥэринэр. Эн ол киһиэхэ итэҕэйэн барар буоллаҕыҥ. Киниттэн 10 да бырыһыан билиини сомсон ыллаххына үчүгэй. Итинник кыра-кыралаан билииҥ чороонун толорунаҕын. Уһуйааччы үөрэнээччититтэн эмиэ элбэҕи эбинэр.

Манна муҥутуур үрдэл диэн суох. Чороонуҥ хаһан да туолбат. Син биир муораҕа биир таммах ардах түһэрин кэриэтэ. Тоҕо диэтэххэ өйгүнэн-санааҕынан итэҕэлгэ, сиэргэ-туомҥа киирэн бара тураҕын. Муҥур уһуга биллибэт, ол иһин ити эн ыйытар үрдэлиҥ суох. Бүтэн, тохтоон хаалбаккын. Бииртэн биир үөрэҕи баһылааһын – олус үчүгэй турук.

Аан дойду нэҥиртэн турар...

– Ону ыспакка-тохпокко, аргыый аҕай арыйан ылыныах тустааххын. Туох барыта нэҥиртэн тутулуктаах. Сырдык сарыал уота биһиэхэ аҕа халлаантан кэлэр. Эн эккин-сииҥҥин сырдыгынан сыдьаайар оҥорор. Биһиги ийэ сиртэн нэҥир ылабыт. Туох барыта нэҥирдээх уонна иччилээх.

Нэҥиргэ туох барыта дьайар. Кыра сыыс тыл даҕаны. Тыл – ох. Атын киһини кыратык да куһаҕан тылынан саҥардаххына, ол киһи нэҥирэ тута алдьанар, онтон төттөрү бэйэҕэр эргийэн, аны эйиэнэ алдьанар. Туох барыта иэстэбиллээх. Итиннэ биири өйдүөх тустаахпыт: эйигин куһаҕаннык да саҥардахтарына, утары тыллаһыма, үөхсэ, этиһэ, охсуһа сатаама, оргуйан турума. Искэр бырастыы гын, ыытан кэбис. Хом санааны мунньунума. Эн өбүгэлэртэн харысхаллааххын, көмүскэллээххин хайа да түгэҥҥэ умнума. Хас биирдии киһи харысхала – бэйэтигэр итэҕэлэ уонна бигэ туруга. Ону таһынан араас эмэгэттэри ылан кэтиэхтээх. Оччоҕуна түгэх өйүнэн харысхаллаах курдук сананар.

Нэҥирэ киртийбит киһи саанан ытыллыбыт курдук дьөлөҕөстөрдөөх буолар. Туга да табыллыбат, куруук кыыһыра сылдьар, суола сабыллар. Киртийбит нэҥири ыраастаан, арчылаан, алгыстаан көннөрөҕүн. Итиннэ киһи бэйэтэ эмиэ көмөлөһүөхтээх, иккиэн тэбис-тэҥҥэ үлэлээтэхпитинэ эрэ ырааһырар. Итэҕэйбэт киһини сиэргэ-туомҥа, итэҕэлгэ хайдах да аҕалбаккын.

Удьуордааһын

– Бу өттүгэр рунанан киирэн кэпсиим. Баҕар, итини үөрэппит эрэ дьон сөпсөһүөхтэрин сөп. Ылыналлара дуу, ылымматтара дуу. Биһиги ДНК-быт сахалыы төрүт дорҕооннорбутунан, чуолаан дифтоннарбытынан наһаа үчүгэйдик ыраастанар, өрө көтөр. Оһуохайы ылан көрүөххэ: оһуо-оһуо-оһуохай, эһиэ-эһиэ эһиэхэй. Үөрэн-көтөн таһаараҕын эбээт. Орто дойдуга «Иэй!» диэбитинэн төрүүгүн. Ырыаҕа-тойукка, хомуска уһуйааччылар эмиэ дифтоннарынан үөрэтэллэр. Ити аата кинилэр киһи ДНК-тын оонньотон, өбүгэлэртэн кэлбит ис туруктарын уһугуннараллар. Ол аата дорҕоон нөҥүө атын нэҥир киирэр.

Уоскуйар, уларыйар

– Билигин үгүс киһи арыллар. Уһуйааннарга үөрэнээччи элбээтэ. Мин санаабар, дьон айылҕа күүһүн билинэр буолла. Итинэн биһиги өбүгэлэрбитигэр чугаһыыбыт. Итэҕэлгэ кэллэхпитинэ, айылҕаҕа элбэхтэ сылдьар буолабыт, күнтэн күүс ылабыт.

Киһи итэҕэлгэ кэллэҕинэ уоскуйар, уларыйар, билиитэ эбиллэр, сири-дойдуну, дьону атыннык көрөр буолар. Дьиэтин да иһигэр оннук эйгэ төрөөн-үөскээн барар. Манна биири эбэн этиэхпин баҕарабын. Сиэргэ-туомҥа, итэҕэлгэ омугуттан тутулуга суох, ким баҕарар кэлиэн сөп. Бу аан дойдуга иэгэйэр икки атахтаах бары биир тэҥ.  Арай дьүһүммүт, тылбыт эрэ атын. Доҕордоһуу, бэйэ-бэйэни өйдөһүү инники күөҥҥэ туруохтаах.

Бүгүҥҥүнэн олор, билиҥҥигин харыстаа

– Кэнники кэмҥэ олохпут, айылҕабыт олус күүскэ уларыйан, анал байыаннай дьайыы сабыдыаллаан, дьон нэҥирэ атыннык үлэлиир. Нэҥир бөлүөҕэ (сгусток энергии) бөҕө үөскүүр, онтон иҥнэн, хааман иһэн охтуоххун да сөп. Маннык кэмҥэ киһи уларыйыылартан куттаммакка, утарса, өсөһө сатаабакка, онно аргыый киирэргэ дьулуһуохтаах. Хомойуох иһин, эйгэ киһиттэн тутулуга суох. Ол эрээри барытыттан куттана сырыттахха, тугу ситиһиэххиний.

Сарсыҥҥы күҥҥэ эрэл суох да буоллун, эн бүгүҥҥү күнүнэн, билиҥҥинэн олор. Кэлэр кэм үүнэ илик, иннигэр туох күүтэрин билбэккин. Ааспыт аастаҕа, кэннигэр хааллаҕа. Син биир табыллар – табыллар, табыллыбат – табыллыбат. Ону хайдах да уларыппаккын. Ол иһин билиҥҥи олоххор эрэллээх буол, билиҥҥигин харыстаа.

Эйгэлээх дьон күүс-көмө буолуохтара...

– Сотору өссө ыарахан кэмнэр бүрүүкүөхтэрэ. Эйгэлээх дьон эмискэ мээнэҕэ элбээбэтэ. Олохпут биһигини бэлэмниир. Анал байыаннай дьайыыттан уолаттарбыт төннөллөрүгэр барыбытыгар да сүрдээх улахан күүс-көмө наада буолуо. Төһөлөөх элбэх эр киһи уйулҕата төннөн, ыһыллан, муунтуйан кэлиэ биллибэт. Саха сирэ онно ончу бэлэмэ суох. Ол иһин уһуйааннар, психологическай көмөнү оҥорор дьоҕус хостор арыллыахтарын наада. Эйгэлээх дьон сүбэ-ама биэрэннэр, күүс-көмө буолуохтара этэ...

Аны туран, анал байыаннай дьайыыттан эйгэҕэ кэлбит уол элбэх. Дойдуларыгар төннүбүт уолаттарбыт алгыска сылдьаллар. Онон эр дьоммут итинник көмөҕө наһаа наадыйаллара саарбаҕа суох. Кинилэргэ эйгэлээх, сиэргэ-туомҥа үөрэммит дьон быдан көмөлөһүөхтэрэ этэ. Уолаттарбытын бары өттүнэн көмүскэллээх көрсөргө бэлэм буолуохтаахпыт.

Бар дьоҥҥо туһаайан

Чараас эйгэҕэ үлэлээччилэргэ. Искитигэр кэлбит күүһү сөптөөхтүк туһаныҥ. Санааҕыт күүстээх буоллун.

Саҥа кэлээччилэргэ. Кэтэһимэҥ, кэлиэхтээх кэмҥитигэр кэлиэххит, туох барыта кэмнээх-кэрдиистээх. Бастаан бэйэҕитин иһиллэниҥ. Киһи син биир өйүнэн-санаатынан, этинэн-сиининэн билэр.

Бар дьоҥҥо. Айыыларгытын, иччилэргитин, үтүө өбүгэлэргитин куруутун саныы сылдьыҥ. Биһиги куруук махталынан, тапталынан олоруох тустаахпыт. Сирдээҕи киһи барыта уоскулаҥҥа кэлиэхтээх.