19.01.2024 | 10:00

Эксээмэннэр болдьохторо билиннэ, бэлэмҥин дуо?

Бу ый саҥата Арассыыйа Үөрэҕириигэ министиэристибэтэ уонна Үөрэҕи кэтээн көрөр федеральнай сулууспа биир кэлим эксээмэн (ЕГЭ) уонна сүрүн судаарыстыбаннай эксээмэн (ОГЭ), судаарыстыбаннай түмүктүүр эксээмэн (ГВЭ) быйылгы болдьохторун бигэргэттилэр.
Эксээмэннэр болдьохторо билиннэ, бэлэмҥин дуо?
Ааптар: Айталина Софронова
Бөлөххө киир

Ол курдук, бирикээскэ этиллэринэн, Биир кэлим эксээмэн (ЕГЭ) сүрүн түһүмэх иннинээҕи күннэрэ 2024 сылга кулун тутар 22 күнүттэн муус устар 22 күнүгэр диэри ыытыллыахтара. Бу түһүмэххэ улахан төрүөттээх, убаастанар биричиинэлээх буоллахха туттарар көҥүллэнэр.

Сүрүн түһүмэх – бэс ыйын 23 күнүттэн от ыйын 1 күнүгэр диэри.

Эбии түһүмэх – балаҕан ыйын 4-23 күннэригэр. Бу түһүмэххэ эмиэ улахан төрүөттээх оҕо туттарара көҥүллэнэр.

 

Биир кэлим эксээмэн бары предметтэргэ сүрүн ыытыллар күннэрэ:

Ыам ыйын 23 күнэ – география, литература, химия

Ыам ыйын 28 күнэ – нуучча тыла

Ыам ыйын 31 күнэ – математика (базовай уонна профильнай)

Бэс ыйын 4 күнэ – обществознание

Бэс ыйын 7-8 күннэрэ — информатика

Бэс ыйын 10 күнэ – история, физика

Бэс ыйын 13 күнэ – биология, омук тыллара (суругунан чааһа)

Бэс ыйын 17-18 күннэрэ  – омук тыллара (тылынан чааһа)

Бэс ыйын 20 күнүттэн от ыйын 1 күнүгэр диэри – бары предметтэргэ саппаас  күннэр

 

Тохсус кылаас үөрэнээччилэрин болҕомтотугар

Тохсус кылаас үөрэнээччилэригэр быйылгы сүрүн судаарыстыбаннай эксээмэн (ОГЭ) үс түһүмэҕинэн ыытыллар. Ол курдук – сүрүн түһүмэх иннинээҕи күннэр (муус устар 23 күнүттэн ыам ыйын 18 күнүгэр диэри), сүрүн түһүмэх (ыам  ыйын 21 күнүттэн от ыйын 2 күнүгэр диэри) уонна эбии түһүмэх (балаҕан ыйын 3-24 күннэригэр) буолаллара бигэргэннэ.

 

Сайабылыанньаны тутуу номнуо бүтэн эрэр

Биллэн турар, хас биирдии эксээмэн тус сайабылыанньата суох ыытыллыбат. Быйыл Биир кэлим эксээмэни туттарааччылартан (ЕГЭ) олунньу 1 күнүнэн сайабылыанньаны хомуйуу түмүктэнэр. Онон туттара иликтэри тиэтэйэргитигэр сүбэлиибит.

 

Сайабылыанньаны ханна ылалларый?

Быйыл оскуоланы бүтэрэр оҕолор сайабылыанньаларын үөрэнэр оскуолаларыгар суруйан биэрэллэр. Урукку сылларга бүтэрбиттэр сайабылыанньаларын олорор сирдэринэн улуустааҕы үөрэх салааларын уорганнарыгар, оскуолаларга тиксэрэллэр. Оттон үөрэх бырагырааматын хаттаан үөрэтэн  туттарааччылар (экстерн) – судаарыстыбаннай түмүктүүр түһүмэҕи туттарарга анаммыт оскуолаларга. Атын регионтан көһөн кэлбит, чопчу олорор сирэ суох дьон үөрэх ханнык баҕар управлениетыгар туттарар кыахтааххыт.

 

Бэйэм тиийэр кыаҕым суох буоллаҕына?

Сайабылыанньаны, эксээмэн туттарааччылар туоһулуур докумуоннарын көрдөрөн туран, кинилэр төрөппүттэрэ (сокуоннай бэрэстэбиитэллэрэ) эбэтэр Арассыыйа гражданскай сокуонун бэрээдэгинэн толоруллубут дэбиэринэстээх дьон биэриэхтэрин сөп.

 

Олунньу 1 күнүгэр диэри тиэтэйэ охсуҥ!

Өскөтүн киһи бэйэтэ араас биричиинэнэн олунньу 1 күнүгэр диэри сайабылыанньаны туттарбатах буоллаҕына, эксээмэннэр ыытыллыахтарын икки нэдиэлэ иннинэ бигэргитиини ылыахтарын сөп. Ол эрээри эһиги биричиинэҕит улахан төрүөттээх эрэ түгэнигэр. Холобура, улахана ыарыы кэнниттэн эбэтэр атын да түгэн буолуон сөп. Онон үөрэххэ туттарсыан баҕалаахтар ыйыллыбыт болдьоххо олунньу 1 күнүгэр диэри сайабылыанньаҕытын суруйарга ыксааҥ.

 

Үрдүк үөрэх алын бааллара бигэргэтиллибиттэр

Быйылгы үөрэх дьылыгар үрдүк үөрэххэ туттарсарга Биир кэлим эксээмэннэр (ЕГЭ) алын бааллара номнуо бигэргэнэн турар.

 

 

Үрдүк үөрэххэ киирэргэ саамай аччыгый баал:

Нуучча тыла — 40;

Математика — 39;

Информатика — 44;

Физика — 39;

Обществознание — 45;

История — 35;

Омук тыла — 30;

Литература — 40;

География — 40;

Биология — 39;

Химия — 39.

Ол эрээри «бу баалы ыллым даҕаны, үрдүк үөрэххэ киирэр чиэстэнним” диир сыыһа. Төһөнөн билииҥ-көрүүҥ киэҥ, баалыҥ үрдүк буолар да, соччонон үрдүк үөрэххэ киирэр кыаҕыҥ үрдүк. 

 

Оскуоланы бүтэрээччилэр санаалара:

Лена Иванова:

Ханнык үөрэххэ киирэрбин үчүгэйдик быһаарынан, бэйэбэр сыал-сорук туруорунан сылдьабын. Ол курдук, Иркутскай куоракка Медицина институтугар үөрэниэхпин баҕарабын; кыаллыбат түгэнигэр, манна Саха сиригэр хаалыаҕым. Үөрэҕим бүтэһик сыла элбэх интэриэһинэй түгэннэрдээх, таһаарыылаах буолан эрэр дии саныыбын. Ол эрээри  улахан болҕомтону Биир кэлим эксээмэннэргэ уурабын.

 

Эльдар Иванов:

Быйыл БКЭ туттарарым быһыытынан, үөрэхпэр олох күүскэ ылсан сылдьабын. Эксээмэннэрбин 90-тан тахса баалга суруйар баҕалаахпын. Физика уонна информатика предметтэрин таллым, инники олоҕум информационнай эйгэни кытта ситимнээх буоларыгар эрэнэбин. 

 

Миша Гуляев:

БКЭ-ҕэ күүстээх бэлэмнэнии саҕаланна. Эбии үөрэххэ сылдьан, БКЭ ис хоһоонун быһаарыстым. Билиҥҥи туругунан киин сирдэр үөрэх кыһаларын орто баалларыгар эппиэттэһэр курдукпун. Быйылгы эксээмэннээх оҕолорго барыларыгар улахан ситиһиини баҕарабын.

Сонуннар

Ордук ааҕаллар

Ким? Төһө? Туохха?
Сонуннар | 17.02.2024 | 12:00
Ким? Төһө? Туохха?
Ааҕааччыларбытын кытта Сахастат ааспыт 2023 сыл түмүгүнэн таһаарбыт өрөспүүбүлүкэбит социальнай-экономическай туругун кэккэ чахчыларын кытта үллэстэбит.
Ийэлиин кэпсэтии...
Сонуннар | 16.02.2024 | 18:30
Ийэлиин кэпсэтии...
Анал байыаннай дьайыы тиэмэтин суруйарбар төрөппүтү, ийэни, аҕаны кытта кэпсэтэр ордук ыарахан. Кэпсэтэ олорон бөтө бэрдэрэн, оҕотун санаан, аһынан тохтоон, хараҕын уутун соттон, ол быыһыгар, кини туһунан кэпсиэхтээҕин, кини дьоруойун бар дьон билиэхтээҕин санаан, күүстээх санаатын, тулуурун киллэрэн эмиэ саҥарбытынан барар. Биир сөҕөрүм диэн, маннык кэпсэтиилэргэ биир да төрөппүт, уолаттар...
Ыар сүтүк
Дьон | 17.02.2024 | 16:00
Ыар сүтүк
Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн өрөспүүбүлүкэ ыар сүтүктэннэ.
Сүүтүк саҕа сүбэлэр
Тускар туһан | 17.02.2024 | 10:00
Сүүтүк саҕа сүбэлэр
Бүгүҥҥү нүөмэрбэр хаалбыт 25 сүбэни бэчээттиибин. Ааҕан туһаныаххыт диэн эрэнэбин, олоххут куруук күөх хонуунан аастын, күҥҥүт чэмэлийэ тыктын, дьоллоох-соргулаах буолуҥ!