Эксээмэҥҥэ үрдүкү баалы ыллылар

Быйыл Дьокуускай куорат оскуолатын 2531 оҕо бүтэрэр, оттон 9-с кылааһы – 5256.
Бүгүҥҥү туругунан БКЭ, ОГЭ эксээмэннэрин түмүктэрэ үгүстэрэ билиннэ. Ол курдук, судаарыстыбаннай эксээмэннэргэ куорат уокуругун оскуолаларыттан үгүс үөрэнээччи үрдүкү баалы ылары ситистэ.

Биир кэлим эксээмэҥҥэ (БКЭ) куорат оскуолаларыттан бүгүҥҥү күн туругунан 100 баалы ылбыт выпускниктар:

Химия эксээмэнигэр 100 баалы В.П. Ларионов аатынан Физико-тэхиньиичэскэй лицей үөрэнээччитэ Кирилл Степанов. Учуутала – Е.Д. Широких. Санатар буоллахха, Екатерина Дмитриевна бу иннинэ икки үөрэнээччитэ БКЭ-ни 100 баалга туттаран турар.

Ааспыт сылга куорат муниципальнай оскуолатын бүтэрээччилэртэн нуучча тылын уонна литературатын эксээмэнин  5 оҕо 100 баалга туттарбыта.  Быйыл нуучча литературатын икки выпускник үрдүкү баалга туттарда.

Арина Леонова, Маҕан орто оскуолатын бүтэрээччи, учуутала – Дьячковская Мария Степановна. Судаарыстыбаннай эксээмэҥҥэ 100 баалы ылыы – Маҕан оскуолатын историятыгар бастакы ситиһии.

Айталина Чупрова, Дьокуускайдааҕы 39-с №-дээх орто оскуолатын үөрэнээччитэ литература эксээмэнин эмиэ 100 баалга туттарда. Учуутала –Марианна Дмитриевна Ефимова. Оскуола быйыл бастакы выпуһун таһаарар сылыгар тута БКЭ-ҕэ үрдүкү ситиһиини көрдөрдө.

Быйыл профильнай математиканы өрөспүүбүлүкэ үрдүнэн 5 выпускник 100 баалга туттарда. Олор истэригэр Дьокуускай куорат оскуолаларыттан В.П. Ларионов аатынан Физико-тэхиньиичэскэй лицей үөрэнээччитэ Анастасия Романюк баар. Учуутала – Любовь Сергеевна Герасимова. Бу – РФ үөрэҕириитин бочуоттаах үлэһитин иккис үөрэнээччитэ БКЭ-ҕэ 100 баалы ылыыта.

Быйыл нуучча тылын эксээмэнэ ыам ыйын 30 күнүгэр буолбута. Ол түмүгүнэн нуучча тылын икки выпускник 100 баалга туттарда. Кирилл Степанов, В.П. Ларионов аатынан Физико-тэхиньиичэскэй лицей үөрэнээччитэ, учуутала – Елена Васильевна Антонова. Кирилл бу иккис эксээмэнин (бу иннинэ химияны) 100 баалга туттарбытын бэлиэтээн ааһар тоҕоостоох.

Софья Карамзина, 8-с №-дээх куорат классическай гимназиятын выпускнига нуучча тылыгар эмиэ 100 баалы ылары ситистэ. Учуутала – Анна Джорджевна Матвеева.

Маны сэргэ Дьокуускайга баар өрөспүүбүлүкэтээҕи икки оскуола 2 выпускнига нуучча тылын эмиэ 100 баалга туттардылар: Эркин Ноговицын, “Өрөспүүбүлүкэтээҕи интэринээт-лицей үөрэнээччитэ (иккис эксээмэнигэр 100 баалы ылыыта) уонна СӨ Арктикатааҕы оскуолатын үөрэнээччитэ Диана Оразбаева.

Санатар буоллахха, БКЭ-ҕэ 100 баалы ылбыт үөрэнээччилээх учууталлары Дьокуускай куорат баһылыга 100 тыһ. солк. бириэмийэлиэҕэ.

Сүрүн судаарыстыбаннай эксээмэни (ОГЭ) үрдүкү баалга туттардылар

Куорат оскуолаларын 9-с кылааһы бүтэрээччилэрэ түмүктүүр аттестацияны бэрт ситиһиилээхтик туораан иһэллэр. Ол курдук, бүгүҥҥү күн туругунан эксээмэҥҥэ үрдүкү баалы ылары ситиспит үөрэнээччилэри билиһиннэрэбит:

Английскай тылы үрдүкү (68) баалга туттардылар: Дьячковская Дайаана,  А.Г. уонна Н.К. Чиряевтар ааттарынан Дьокуускай куораттааҕы национальнай гимназия, Кира Степанова, 6-с №-дээх орто оскуола уонна Майя Семенова, “Айыы кыһата” НГ. 

Информатика эксээмэнин саамай элбэх оҕо үрдүкү баалга (21 баал) туттарда – 10 үөрэнээччи: Николай Старков (ДьКНГ), “Айыы Кыһатын” үөрэнээччилэрэ Иван Тарскай, Мария Попова, Сайаана Николаева, 7-с №-дээх оскуолаттан Артём Ефимов, 23-с №-дээх оскуолаттан Светлана Гаврильева, Елизавета Сивцева (29-с №-дээх оскуола)  уонна Дьокуускай куораттааҕы лицей үс үөрэнээччитэ Евгений Корбанков, Эмма Мастерова, Василий Рац.

Физиканы (39 баал): Иван Сивцев, Дьокуускай куораттааҕы лицей, историяны (37 баал) – Ника Кательницкая, 5-с №-дээх оскуола, химияны (38 баал): Сандаара Павлова, куораттааҕы национальнай гимназия, Полина Турова, 5-с №-дээх оскуола, Константин Федулов, 8-с №-дээх классическай гимназия, Таисия Павлова, ФТЛ, Диана Макарова, ДьКЛ. 

Географияны (31 баал): Анна Неустроева, “Айыы Кыһата” НГ, Лилия Ядреева, “Айыы Кыһата” НГ, Арианна Керемясова, 33-с №-дээх оскуола,.

Математиканы (31 баал): 2-с №-дээх национальнай политехническай оскуола 2 үөрэнээччитэ Гавриил Томскай, Лаура Афанасьева, Дьокуускай куораттааҕы лицейин үөрэнээччитэ Диана Макарова уонна физико-тэхиньиичэскэй лицей үөрэнээччитэ Саян Иванов.

Быйыл 9-с кылааһы бүтэрээччилэр бэс ыйын 16 күнүгэр сүрүн эксээмэн тиһэх 4 предметигэр эксээмэни туттардылар. Ол түмүгэ бэс ыйын 27 күнүттэн хойутаабакка биллэрэ күүтүллэр. Бу ый 26 уонна от ыйын 2 күннэрэ ОГЭ-ны туттарарга эбии саппаас күннэринэн буолуохтара.

Күнүскү лааҕырдарга –  6000 оҕо

Үөрэх дьыла түмүктэнэн, бэс ыйыттан сайыҥҥы лааҕырдар үлэлэрин саҕалаатылар. Быйыл сайын Дьокуускайдааҕы муниципальнай үөрэх тэрилтэлэрин базаларыгар күнүскү лааҕырдарынан 6000 оҕо хабыллыа. Былырыыҥҥыга тэҥнээтэххэ (4220 оҕо), балачча элбээбит. Куорат кытыытынааҕы лааҕырдарга былырыын 934 оҕо сынньаммыт эбит буоллаҕына, быйыл сайын 1700 оҕо хабыллара былааннанар. Бу “Спутник” лааҕыр федеральнай бырагыраамаҕа кыттан эбии утуйар 4 куорпуһу тутан киллэрбитинэн ситиһиллибит. Маны сэргэ “Улаатан эрэр оҕо киинин” салалтатынан “Таежный герой” уонна “Путь Росомахи”, агрооскуолалар уонна Дьокуускай куорат психолого-медико-социальнай арыаллааһын киинин балаакканан уонна үлэ лааҕырдарыгар симиэнэлэр аһыллыахтара.

Үөрэҕирии салалтатын сайыҥҥы хампаанньатынан 2000-тан тахса оҕо үлэнэн хааччыллыа.

Дьокуускайдааҕы үөрэх управлениетын матырыйаалларынан