Экс-мэр Сардана Авксентьева атыылаппыт «Крузактарын» харчыта ханна тиийбитий?

Суоппар Михаил Готовцевтан маннык өҥөнөн туһаныыга туох докумуон наадатын сурастыбыт.

– Бу анал оҥоһуулаах массыына 1 – 2  группалаах инбэлииттэргэ ананар. Доруобуйатынан хааччахтаах киһи буоларын туоһулуур МСЭ ыспыраапката уонна пааспара наада. Инбэлиитэ суох буоллаҕына, пассажир быһыытынан төлөбүрү оҥорор.

Бу айан туһунан сиһилии быһаарсаары, «Киин куорат» Богатырев уулуссатыгар баар Дьокуускай куораттааҕы Арассыыйа инбэлииттэрин уопсастыбатын бэрэссэдээтэлэ Александра Максимовна Николаевалыын сибээстэстэ.

– Бырагыырама Дьокуускай куорат инбэлииттэрин уопсастыбатын  иһинэн үлэлиир. Историятыгар тохтоон аастахха, бу иннинэ бэрэссэдээтэлинэн үлэлии сылдьыбыт Екатерина Дмитриевна Емелина Москуба куорат холобурун биһиги куораппытыгар туттуохха сөп эбит диэн санаатын бастаан социальнай сулууспаларга этии киллэрэн, куорат дьаһалтатыгар туруорсубута. Сардана Владимировна Авксентьева мэр буоларыгар муниципальнай «Ленд Крузер» массыыналары атыылыыр быһаарыыны ылыммыттаах дии? Бу бырайыак ол атыы харчытынан олоххо киирбитэ.

Балаһыанньа быһыытынан, биир киһи ыйга түөртэ эрэ сылдьара көҥүллэнэр. Ол барыыта социальнай суолталаах эбийиэк буолуохтаах. Холобур, балыыһаҕа анаалыс туттара барар-кэлэр түгэнигэр, икки сырыынан ааҕыллар. Оттон кыбартыыраттан даачаҕа барыы төлөбүрдээх. Чэпчэтии диэн эмиэ баар. Ол курдук, биир сырыы төлөбүрэ 200 солк. буоллаҕына, харахтарынан инбэлиит дьоҥҥо 50 солк. буолар.

Суоппардар пассажирдарын дьиэлэрин ааныттан тиийиэхтээх сирдэригэр тиийэ арыаллыыллар.

Дьокуускай куоракка ордук сытар ыарыһах дьоҥҥо маннык анал сулууспа баара тустаахтарга тыын боппуруоһу быһаарар. Кыһалҕалаах дьон 26-24-01, 715333 төлөпүөннэринэн билсиэхтэрин сөп.