Экэниэмикэ форумуттан өссө биир сонун

Ол туһунан Петербурга буолар турар Норуоттар икки ардыларынааҕы экэниэмикэ форумугар (ПМЭФ-2026) Ил Дархан Айсен Николаев, ДОМ.РФ генеральнай дириэктэрэ Виталий Мутко уонна «Селигдар» ПАУо бэрэсидьиэнэ Александр Хрущ бииргэ үлэлэһии дуогабарыгар илии баттаспыттар.

Алдаҥҥа «Селигдар Вилладж» диэн тутулла турар коттеджтаах бөһүөлэк бааар эбит. Ол базатыгар “Селигдар” холдинг үлэһиттэригэр анаан, уларсыкка (арендаҕа) бэриллэр олорор дьиэ пуондатын тэрийиэхтэрэ. Ол быһыытынан, ДОМ.РФ 40 биирдиилээн олорор дьиэни кытта,  10 блоктаах дьиэни, ону тэҥэ уопсайа 12,8 тыһ. кв. м иэннээх спорт холбоһугун уонна чааһынай оҕо саадын тутуутун үбүлүүр буолбут.

«Дьон олорор уонна үлэлиир усулуобуйатын оҥорууга, тупсарыыга  куортамҥа бэриллэр дьиэлэри тутуу төһүү көмө буолар. Чуолаан бырамыысыланнай оройуоннарга олус наадалаах. Бу – идэтийбит, таһымнаах каадыры сэҥээрдэргэ, тутуу салаатын сайыннарарга уонна эрэгийиэҥҥэ олох хаачыстыбатын үрдэтэргэ дьоһун суолталаах бырайыак», – диэн Айсен Николаев бэлиэтээбит.

Бырайыагы икки түһүмэҕинэн олоххо киллэрэри былаанныыллар. Ол эбэтэр быйыл 22 чааһынай дьиэни үлэҕэ киллэрэргэ суоттаналлар. Уоннааҕы тутууну  – эһиил.

Виталий Мутко этэринэн, ДОМ.РФ инньэ 2016 сылтан куортамҥа бэриллэр дьиэ ырыынагын сайыннарыыга ылсан дьарыктанар. Билиҥҥитэ хампаанньа 22 эрэгийиэҥҥэ 92 бырайыактаах, онно киирсэр тутуу уопсай иэнэ 1,1 мөл. кв. м тэҥнэһэр эбит. Корпоративнай куортамҥа ураты болҕомтону ууралларын бэлиэтиир: “Бу – бөдөҥ хампаанньалар ортолоругар киэҥник тарҕаммыт ньыма. Холобур, Саха сиригэр номнуо үс бырайыак ситиһиилээхтик үлэлээн, итинник дьиэни 400-тэн тахса дьиэ кэргэн туһанар. Куортамҥа бэриллэр дьиэ экэниэмикэ өттүнэн барыстаах эрэ буолбатах, тэрилтэлэргэ каадыр көстүбэт кыһалҕатын быһаарар. Тоҕо диэтэххэ, дьон үлэ көрдөнөрүгэр туох-хайа иннинэ олорор усулуобуйатын көрөр”, – диэтэ.

ДОМ.РФ тутааччыттан эбийиэктэри атыылаһан, 5 сыл болдьохтоон (төттөрү атыылаһар эбэһээтэлистибэлээх) «Селигдар» ПАУо-ҕа куортамҥа биэрэр.  “Идэтийбит исписэлиистэри Саха сиригэр тардарга, үлэлэтэ хаалларарга маннык бырайыак наада. Кэнэҕэһин олорор дьиэлэри сэргэ, социальнай эбийиэктэр баар буолуохтара», – диир Александр Хрущ.

ДОМ.РФ номнуо 7 эрэгийиэҥҥэ корпоративнай куортам 12 бырайыагын үбүлүүр. Уопсайа 381,5 тыһ. кв. м. иэннээх 7,9 тыһ. кыбартыыра онно киирсэр.  Инвестицията – 37,8 млрд солк. Билигин 9 бырайыак үлэлии турар: 2,7 тыһ. кыбартыыра онно киирсэр, уопсай иэннэрэ – 128,4 тыһ. кв. м.

Манна даҕатан эттэххэ, «Селигдар» холдинг — Арассыыйа кыһыл көмүһү хостуур тэрилтэлэриттэн биир бөдөҥнөрө. Сүрүннээн кыһыл көмүһү уонна хорҕолдьуну хостуур. Ол курдук, 2025 сылга 8,1 т кыһыл көмүһү, 3,5 тыһ. т хорҕолдьун концентратын бэлэмнээбит.  Кыһыл көмүс саппааһа 2026 сыл тохсунньу 1 күнүнээҕи туругунан — 295 т, хорҕолдьун — 403 тыһ. т. Холдинг актыыба Бурятия уонна Саха өрөспүүбүлүкэлэригэр, Алтай уонна Хабаровскай кыраайдарга, Иркутскай уонна Оренбург уобаластарыгар, Чукоткаҕа баара этиллэр.