Егор Явловскай үөрэҕэр, дьарыгар төнүннэ

...Массыына айаныгар бигэнэн утуйа сыппыт эдэркээн уол Егор Явловскайы илиитигэр күүскэ анньан уһугуннарбыт, аттыгар олорбут эр киһи массыына түннүгүнэн тахсан эрэрэ. Уол элбэҕи толкуйдуу барбакка кини кэнниттэн тымныы муустаах уу уорааныттан түптэлэс тымныыга биирдэ баар буола түспүтэ. Тахсаат тула өттүн көрүнүөхчэ буолан истэҕинэ таҥаһа илийэн тордоччу тоҥон хам ылан барбыта. Алдьархай ааҥнаабытын, дьоҥҥо көмө наада буолтун өйдөөт, үгүһү толкуйдуу барбакка, сибээс баар сиригэр тиийэр сыаллаах иннин хоту сүүрбүтэ. Кэнниттэн «Барымаа, үлүйүөҥ!” – диэн аргыстара хаһыытыы хаалбыттара.

Хорсун уол Егор Явловскай туһунан кэпсиир буоллахха, ХИФУ физкултуурунай институтун магистрана. Кыра эрдэҕиттэн тустуунан дьарыгын салгыы сайыннараары бу иккис үрдүк үөрэҕэр үөрэнэр эдэр киһи эбит. Кини  Чурапчытааҕы оҕо спортивнай интэринээт-оскуолатын 2020 сыллаахха бүтэрбит. Эһэтэ Егор Васильевич Пудов – Коркин үөрэнээччитэ.

Бу күннэргэ Улан-Үдэҕэ сынньана сылдьар эһээтин кытта төлөпүөнүнэн сибээстэһэ сырыттыбыт:

– Егор Васильевич, эһээ киһи быһыытынан, бастаан бу түбэлтэни истээт туох санаа кэлбитэй? Гоша оҕо сааһыттан чөл олох эйгэтигэр улааппыт эдэр киһи буоллаҕа дии?

– Биһиги икки кыыс оҕолоохпут. Уол сиэн бастаан кэлбитигэр үөрүүбүт үрдэ суоҕа. Улахан кыыс сиэммит кэннэ Егор сиэннэрбититтэн бастакы уол. Күтүөппүт тренер буолан дьыссаакка сылдьар эрдэҕиттэн  тустууга уолаттарын сыһыарбыта. Билигин бырааттыылар иккиэн тусталлар, физкултуурунайга үөрэнэллэр. Спордунан дьарык уол оҕоҕо иҥэрэр хаачыстыбата баһаам дии саныыбын.  Киһи быһыытынан дьулуур, тулуур, ону ааһан түргэн өй. Ол иһин даҕаны бу хаачыстыбалар баар буоланнар Егор үгүһү толкуйдуу барбакка, түргэн быһаарыныы ылына охсон, дьоҥҥо көмө көрдөөн сүүрэ турдаҕа. Кини кыра эрдэҕиттэн толкуйдуур, ырыҥалыыр дьоҕурдаах буола улааппыта.

Оо, бастаан истэн бараммыт эбээтиниин долгуйаан. Тыыннаах хаалбытыгар үөрүү! Түннүк тааһын алдьаппыт, сиэммитин, утуйа сытар эдэр киһини уһугуннарбыт киһиэхэ, махтанабыт. Хомойуох иһин, бу түбэлтэ икки киһи олоҕун илдьэ барбыта сүрдээх кутурҕаннаах.
Чөл олоҕу тутуһа, хамсана-имсэнэ  сылдьыы киһиэхэ эт-сиин өттүнэн сайдыыгар суолтата үрдүк. Егор Коркин аатынан интэринээт-оскуолаҕа иитиллэн, уһуйуллан тахсыбыта төһүү күүс буолбута саарбаҕа суох.

Бэҕэһээ, тохсунньу 12 күнүгэр, быһылааҥҥа түбэспиттэр этэҥҥэ буоланнар, балыыһаттан тахсыбыттара. Егор Явловскай доруобуйата кэминэн, үөрэҕин, дьарыгын салгыыр.