Егор Слепцов: "Хейтердэртэн иммунитеттаах киһибин"

Егор айылҕаттан дэгиттэр, сатабыллаах туттуулаах. Сатаабата диэн суох. Тимиринэн, маһынан, сэлии муоһунан уһанар, тиэхиньикэҕэ ураты сыстаҕас, астыырын да сөбүлүүр, ырыаһыт быһыытынан даҕаны Саха сирин бары муннугар күүтүүлээх ыалдьыт. Ону таһынан араас видеолары устан дьон сэҥээриитин ылар блогер.

“Мин оҕо эрдэхпиттэн 2-с группалаах инбэлииппин.  “Тугу сатыыгыный, туох дьарыктааххыный?” диэн ыйытаргыт оннугар “тугу сатаабаккыный?” диэн ыйытыаххытын сөп буолуо. Үлүһүйэр дьарыгым туох да баһаам, күн солото суох  киһибин. Кэлин ырыанан, блогерствонан кыһаллан дьарыктанабын. Үөрэ-көтө олох устун айаннатан истэҕим  дии”,–  диэн кэпсэтиибитин саҕалыыр Егор.

– Туох идэлээх, үөрэхтээх киһигиний?

– Кыра сылдьан улаханнык тугунан да дьарыктамматаҕым. Наар балыыһаларынан сылдьыбыт киһибин. Оскуола үөрэҕин дьиэҕэ сытан ылбытым. Кыһын дьиэттэн тахсыбакка сытар оҕо этим. Ол иһин, кырдьыгы баарынан эттэххэ, кыратык “баллаас” соҕуспун, суруйарым да, ааҕарым да мөлтөһүөр (күлэр). Ол эрэн учууталларбар барахсаттарга махтанабын, кинилэр баар буолан ааҕар, суруйар буола сырыттаҕым.

Оскуолам кэнниттэн инбэлииттэр лицейдэригэр үөрэммитим. Онно ырыа куруһуогар сылдьан, сыанаҕа тахсарга, дьонтон толлубат буоларга, кэпсэтэргэ-ипсэтэргэ үөрэммитим, киһи быһыытынан арыллан барбытым.

Дойдубар тиийэн кулууппар худругунан үлэлээбитим. Онтон салгыы ол дуоһунаска ийэм үлэлээбитэ – киниэхэ  көмөлөспүтүм. Кыра бөһүөлэккэ ырыаһыт 2-3 баар буолар, онон кэнсиэр аайы ол 2-3 ырыаһыт сыанаттан түспэт этэ. Кэнсиэр аайы ыллаан-туойан, этэн-тыынан дойдубар бэркэ олорбутум.

Билигин сайыҥҥы өттүгэр наар блогердааһынынан дьарыгырдым, кыһыҥҥы өттүгэр гостуруолларга сылдьабын, иллэҥ кэммэр ырыа таһаарабын. Былырыын кыһын устата Анатолий Горохов, Иннокентий Барабанскай-Ырыа Киэсэ, Николай Слепцов-Цой буолан Саха сирин кэрийбиппит. Петр Николаев диэн эмиэ улахан ырыаһыты кытта Өлүөхүмэ улууһунан айаннаабыппыт.

ИККИ КЫНАТТААХПЫН

– Хайҕатаары икки эрэ дипломнаахпын. Бастакы дипломум “Коммерсант в торговле”, иккиһим – “Продавец-контролер-кассир”. Диплом ылбыт идэлэрбинэн биэс да мүнүүтэ үлэлээн көрбөтөҕүм.

Лицейбитигэр эбиэккэ диэри үөрэнэбит, эбиэттэн киэһэ араас куруһуоктардаахпыт. Алексей Калининскай хаһан да ыллаабатах оҕолору дьарыктаан ыллатар этэ. Онно киирэн икки сылы быһа ыллыырга үөрэммитим. Дойдубар ыһыахха тиийэн ыллаан бар дьоммун олус соһуппутум.

Онтон саха эстрадатыгар Анатолий Горохов таһаарда. 2021 сыллаахха кини миэхэ “Дьулуһуом” диэн ырыаны суруйан биэрбитэ, үгүс дьон биһирэбилин ылбыта. Ол ырыаттан сиэттэрэн атыттар айыллыбыттара. Ырыаларбын үксүн Анатолий Горохов суруйар.

Онон икки улахан убайдарбар махталым муҥура суох. Икки кынаттаахпын диибин: биирим улахан ырыа айааччы Алексей Калининскай – Луҥха Өлөксөйө, иккиһим – эстрада артыыһа Анатолий Горохов.

“НИВАЛААХ УОЛАТТАРТАН” САҔАЛААН

– Блогер быһыытынан 2020 сыллаахтан саҕалаабытым. Барыта хааччахтанан турар кэмигэр саатар интэриниэтинэн үлэлээн саҕалыахха диэн, “Нивалаах уолаттар” диэн бөлөх тэринэн вайннары устан саҕалаабыппыт.

Оттон Арсений Винокуровтыын 2015 сыллаахха техникум-интэринээккэ үөрэнэ сылдьан билсибиппит. Сибээспитин хаһан да быспатахпыт. Кини эмиэ блогер буолан хааллаҕа. Мин эмиэ блогер буолбуппун. Онон быйылгыттан кыттыһан вайн устар буоллубут. Биһиги, доруобуйабытынан хааччахтаах дьон, бэйэ-бэйэбитин куруук өйөһөбүт.

Аны видеоларбыт барыта күлүүлээхтэр. Сарказм да диэххэ сөп. Доруобуйаларынан хааччахтаах уолаттар кыыстара суоҕун, аналларын көрсө иликтэрин,  хайдах олороллорун көрдөрө сатыыбыт. Дьон сэргиир, күлэр. “Сериал курдук күүтэбит”, “өссө да таһаара туруҥ” дииллэр. 5-6 күн арыттаах саҥатан саҥа видеолары таһаара сатыыбыт.

Арсенийтан күүс-уох ылабын, кинини көрөн санаам көтөҕүллэр. Ыарахан диагнозтаахпын диэн муҥатыйа олорбот, барытыгар киирэн-тахсан, кэлэн-баран, кэпсэтэн-ипсэтэн уол оҕото. Киһи холобур ылар киһитэ. Кини эмиэ миигиттэн үөрэнэрим элбэх диир. Онон өйдөһөн, өйөһөн, айар үлэнэн дьарыктана, дьону-сэргэни үөрдэ-көтүтэ сылдьабыт.

– Үөхсэр, араастаан саҥарар, суруйар дьоҥҥо хайдах сыһыаннаһаҕын?

 – Дьон сыһыана араас. Биһиги ити чааһыгар иммунитеттаахпыт, үөрэнэн хааллахпыт дии. Кырыы харахтарынан көрөр киһи хаһан баҕарар баар. Уулуссаҕа сырыттахха, холобур, хейтердэр үксүн кыра оҕолор буолаллар. Биһиги кинилэри буруйдаабаппыт, төрөппүттэрэ үөрэппэтэх буоллахтара... Ити мин тус санаам.

Блогер буоллуҥ да хайаан да хейтердэр баар буолаллар. Кинилэргэ хайдах да сыана быһар кыаҕым суох. Куһаҕаны суруйдахтарына этиһэ барбаппын, блоктаан иһэбин. Хейт диэннэрэ эмиэ араастаах ээ – сорохтор үчүгэй баҕайытык олоххо үөрэтэллэр.

“Холобур оҥостобут”, “эн маннык сылдьаргын көрөн санаабыт көтөҕүллэр” диир дьон үгүс – наһаа үөрэбин. Бэл, махтанар дьон бааллар – ол астык. Кинилэр бары миигин кынаттыыллар. Хайҕаатахтарын аайы өрө бара-бара өссө үчүгэй ырыа, өссө күлүүлээх видео уста сатыыбын.

– Куоракка хаһан көһөн кэлбиккиний? Дьокуускай доруобуйаларынан араас хааччахтаах дьоҥҥо төһө табыгастаах дии саныыгын?

– Дьокуускайга былырыын сайын көһөн кэлбитим. Дойдубун наһаа таптыыбын, ахтабын, кэлэ-бара сылдьабын, букатыннаахтык көһөн кэллим да диэбэппин. Билиҥҥитэ үлэ баарын тухары Дьокуускайга баарбын.

Доруобуйаларынан хааччахтаах дьоҥҥо киин куораппыт олох табыгаһа суох диэн этиэм этэ. Холобур, кэлээскэнэн сылдьар доҕорум Арсенийи кытта элбэхтик бииргэ сылдьар буоламмын, ону бэркэ билэбин. Кини аҕыйах сылдьар суоллардаах, ханан куһаҕан тротуар сытарын ааҕа билэр, наар ырааҕынан эргийэн сылдьар. Пандустар баар да буоллахтарына, үгүстэрэ аатыгар эрэ оҥоһуллар буоланнар, табыгаһа суохтар. Хомойуох иһин, биһиги ити кыһалҕа быһаарылларыгар хайдах да дьайар кыахпыт суох быһыылаах...

– Егор, саамай улахан баҕа санааҥ ханныгый?

– Улаханнык тугу да аһара баран ыраламмат, тугу барытын хайдах баарынан ылынар соҕус киһибин. Чэ, арай өссө элбэх дьоҥҥо биллэр блогер, өссө киэҥник биллэр ырыаһыт буолуохпун баҕарабын. Өссө үчүгэй видеолары устан, саҥа ырыалары таһааран, дьону-сэргэни үөрдэ сылдьыбыт киһи.

Егор бииргэ төрөөбүт балта – Үүнэр көлүөнэ тыйаатырын артыыһа, блогер Айыына Слепцова.