Ефимов уулуссата хайдах буолуоҕай?

Ол курдук, 420 м усталаах учаастак бүтүннүү аспааллаах уонна икки балаһалаах гына оҥоһуллар.

Ону сэргэ Хабаров, Ярославскай, Чернышевскай уонна Ефимов уулуссалар быһа охсуһууларыгар 254 м усталаах учаастакка эмиэ хапытаалынай өрөмүөн барар. Манна тротуар уонна бэлисипиэт суола оҥоһуллуоҕа. Уулусса өрүс өттүттэн олбуорданыаҕа. 203-с түөлбэ 30 №-дээх дьиэтин таһыгар массыына парковката тэриллиэҕэ. Куорат баһылыга Евгений Григорьев көҕөрдүү үлэтигэр болҕомто уурарга, Олохтоох дьаһалта дендрологын кытта көрсөн сүбэлэһэргэ этии киллэрдэ.

Атырдьах ыйын 15 күнүгэр диэри «Хабаров, Ярославскай, Чернышевскай, Ефимов уулуссаларын быһа охсуһууларын хапытаалынай өрөмүөнэ» бырайыак чэрчитинэн ититии ситимнэрин саҥардыы үлэтэ ыытылларынан, Ефимов уулуссата бүтүннүү сабыллар, суоппардар уонна сатыы дьон ону учуоттуургутугар ыҥыраллар.

Санатар буоллахха, Дьокуускайга «Олох инфраструктурата» национальнай бырайыак чэрчитинэн 2026 сылга уопсайа 6944 км уһуннаах аҕыс эбийиэккэ үлэ былааннанар.