Ефимов уулуссата аспаалланыаҕа

“Главстрой” тэрилтэ иһитиннэрбитинэн, күн бүгүн лотуоктары туруора, тротуары оҥоро сылдьаллар, уулуссаны сырдатыы, о.д.а.  үлэ ыытыллар.   

Маны таһынан, былаан быһыытынан бэдэрээтчит – «РИК Автодор» тэрилтэ бу нэдиэлэҕэ суолу аспааллаан саҕалыахтаах. Ол туһунан “Главстрой” тэрилтэ дириэктэрэ Афанасий Александров куорат уопсай планеркатыгар иһитиннэрэн турар.

Ефимов уулуссата икки балаһалаах, тротуардаах, бэлисипиэт сылдьарыгар анал ыллыктаах, аныгылыы тупсаҕай парковкаланар миэстэлэрдээх буолуохтаах. Уулуссаҕа сырдатыы уонна көҕөрдүү ыытыллыахтаах.

203-с дьоҕус түөлбэ олохтоохторо куорат киинигэр холкутук тиийэр кыахтаныахтара, сэргэстэһэ сытар уулуссаларга тырааныспар сырыыта аҕыйыырыгар көмөлөһүөхтээх.

Бэлиэтээн эттэххэ, «Олох инфраструктурата» национальнай бырайыак иитинэн Дьокуускайга уопсайа 7 км усталаах уулусса-суол ситимин 8 эбийиэгэ өрөмүөннэнэр.