«Эдэр ыалы олорор дьиэнэн хааччыйыы» бырагыраамаҕа ким кыттыан сөбүй?

Бырагыраамаҕа толору да, толорута да суох дьиэ кэргэн кыттар бырааптаах. Сүрүн ирдэбил ыал дьон 35-рин туола илик буолуохтаахтар. Маны таһынан бырагырааманан дьиэ сыанатын сорҕотугар көрүллүбүттэн ордубут төлөбүрүн уйунар кыахтаах үлэлээх-хамнастаах буолаллара ирдэнэр.

Дьокуускайга “Эдэр ыалы олорор дьиэнэн хааччыйыы” бырагыраамаҕа кыттарга туох ирдэнэрэ

- Дьиэ кэргэн саахсаламмыт буолуохтаах, өскөтүн толорута суох дьиэ кэргэн буоллаҕына, оҕо (оҕолор) бааллара ирдэнэр. Дьиэ кэргэн төһө кэм ыал буолан олороро бырагыраамаҕа киирэргэ оруолу оонньообот.

-  Кэргэнниилэр иккиэн 35 саастарын туола илик буолуохтаахтар.

-  Дьиэ кэргэн төлөһөр кыахтаах үлэлээх-хамнастаах, дохуоттаах буолуохтаах. Судаарыстыба дьиэ сыанатын 30 эбэтэр 35 бырыһыанын уйунар. Онтон атынын дьиэ кэргэн бэйэтэ төлүүр кыахтаах буолуохтаах. Инньэ гынан бырагыраамаҕа киирэр дьиэ кэргэн атыылаһар эбэтэр туттар дьиэтин хаалбыт төлөбүрүн тута эбэтэр ипотеканан төлүүр кыахтааҕын докумуонунан бигэргэтиэхтээх.

- Дьиэ кэргэн олорор дьиэтэ кыараҕаһын, олорор усулуобуйатын тупсарарга наадыйарын туоһулуур докумуон баара ирдэнэр. Холобур, Дьокуускайга олорор дьиэ кэргэн олорор дьиэтигэр биир киһиэхэ тиксэр иэнэ 9 кв. м. кыра буоллаҕына, дьиэ кыараҕаһынан ааҕыллар. 

- Сайаапкалаһааччы СӨ территориятыгар олорор Арассыыйа гражданина буолуохтаах.

- Манна дьүөрэлээх көмө бырагыраамаларга бу иннинэ кыттыбатах буолуохтаах. 

- Сайаапка бэриллэр кэмигэр ыал дьон Дьокуускайга бастайааннай регистрациялаах буолуохтаахтар.

Субсидия ыларга сайаапкаласпыт кэргэнниилэр саастара иккитэ бэрэбиэркэлэнэр: сайаапка биэрэр кэмнэригэр уонна бырагыраамаҕа киирэр ыаллар испииһэктэрин аттарыы кэмигэр.  Бу кэм иһигэр дьиэ кэргэнтэн биирдэстэрэ 36-тын туолла да, дьиэҕэ субсидия ылааччылар испииһэктэриттэн тута таһаарыллар. Онон бу бырагыраамаҕа хапсарга уһата-кэҥэтэ сылдьыбат ордук.

Дьиэлэнэргэ көрүллэр төлөбүр

Судаарыстыбаннай көмөнү ылаллара бигэргэтиллибит дьиэ кэргэҥҥэ дьиэ атыылаһалларыгар (тутталларыгар) диэн сэртипикээт туттарыллар. Бу сэртипикээт дьиэлэнэллэригэр судаарыстыбаттан көрүллэр субсидияны тутталларыгар быраабы биэрэр. Туох баар төлөбүр баанынан (уу харчынан буолбакка) оҥоһуллар. Субсидия кээмэйэ дьиэ кэргэн састаабыттан тутулуктаах.

- оҕото суох дьиэ кэргэҥҥэ дьиэ орто сыанатын 30%-на.

- биир эбэтэр онтон элбэх оҕолоох толору эбэтэр аҥаардас төрөппүттээх дьиэ кэргэҥҥэ дьиэ сыанатын 35 %-на.

Субсидия кээмэйэ хайдах суоттанара

Эдэр дьиэ кэргэҥҥэ көрүллэр дьиэ ыларга (туттарга) субсидия СтЖ = Н х РЖ формуланан суоттанар. РЖ – дьиэ кэргэн киһитин ахсаанынан төһө иэннээх дьиэҕэ (нуорманан) наадыйара. Н – олорор регионугар дьиэ 1 кв. м. нуормаламмыт сыаната. СтЖ – дьиэ уопсай сыаната. Бу сууматтан 30 эбэтэр 35%-нын сударыстыба уйунар.

Олохтоох дьаһалта дьиэ кэргэн дьиэлэнэригэр көмө ыларын бигэргэппитин кэннэ, көрүллэр субсидия чопчуламмыт уопсай суумата сэртипикээккэ суруллар.

Төлөбүрү туохха туһаныахха сөбө

- дьиэ атыылаһарга

- дьиэ туттарга

- ипотеканы ыларга 1-кы усунуос быһыытынан эбэтэр ипотека иэһин төлүүргэ

Манна сүрүнэ дьиэ субсидия бэриллибит регионугар баар буолуохтаах. Чугас аймахтан атыылаһыы көҥүллэммэт. Эдэр дьиэ кэргэн бу иннинэ манна дьүөрэлээх бырагырааманы туһамматах буолуохтаах. Атыылаһар (туттар) дьиэтин бэйэтин көрүүтүнэн талара көҥүл.

Эдэр ыал Дьокуускай куоракка бу субсидияны ыларга туох докумуон ирдэнэрин Дьокуускайдааҕы  дьиэ-уот сыһыаннаһыыларын департаменыттан чопчулаһыан сөп. Ол кэннэ:

- Ирдэнэр докумуону хомуйан, сайаапканы, докумуоннары https://e-yakutia.ru регионнааҕы судаарыстыбаннай порталынан туттарар.

- Болдьоммут кэмҥэ бырагыраамаҕа киирсэрин дуу, суоҕун дуу туһунан быһаарыыны иһитиннэрэллэрин күүтэр.

4. Субсидия ылааччылар испииһэктэригэр киирдэҕинэ, төһөнү ылара суоттанан, бырагыраама сыллааҕы үбүлээһинэ көрүлүннэҕинэ, финальнай испииһэк оҥоһуллар.

5. Эдэр ыал үбүлээһини ылааччылар бүтэһик испииһэктэригэр киирдэҕинэ, Олохтоох дьаһалта ол туһунан иһитиннэрэр. Субсидия сэртипикээтин ыларга сайабылыанньа толоруллар. Счет арыйыллар.

6. Сэртипикээти ылыллыбыт кэмиттэн туттуу болдьохтоох.