Эдэр ыаллар дьиэ туттарга эбэтэр атыылаһарга сертификат туттулар

Куорат баһылыга Евгений Григорьев кулун тутар 12 күнүгэр Дьокуускай куорат эдэр ыалларыгар дьиэ туттарга эбэтэр атыылаһарга социальнай төлөбүрү ылар туһунан сибидиэтэлистибэлэри туттарда. Тэрээһиҥҥэ Куорат дууматын бэрэссэдээтэлин э.т. Евдокия Евсикова кыттыыны ылла.

Куорат баһылыга Евгений Григорьев бэйэтин эҕэрдэ тылыгар ыал дьон оҕолорун иитэр, дьоллорун түстүүр бас билэр дьиэлээх буолаллара сүҥкэн суолталааҕын бэлиэтээн туран, Дьокуускай куорат демографическай балаһыанньата тупсарыгар судаарыстыба ыытар социальнай политиката тирэх буоларын, ол түмүгэр Дьокуускай куорат Уһук Илин регионугар саамай тэтимнээхтик сайдар куораттар ахсааннарыгар киирсэрин бэлиэтээтэ.

«2024 сыл түмүгүнэн Дьокуускай куорат нэһилиэнньэтин ахсаана 389 тыһыынчаны куоһарбыта, ону кытта сылга 4 тыһыынчаттан тахса оҕо төрөөбүтэ. Нэһилиэнньэ орто сааһа – 35, ол эбэтэр олоҕу оҥостор саамай көхтөөх саас», – диэн бэлиэтээтэ Евгений Григорьев уонна эдэр ыалларга чиҥ доруобуйаны, нус-хас олоҕу баҕарда.

Санатар буоллахха, сибидиэтэлистибэлэри биэрии СӨ «Хаачыстыбалаах олорор дьиэнэн хааччыйыы» судаарыстыбаннай бырагырааматын иитинэн ыытыллар. Бырагыраама 35-гэр диэри саастаах эдэр ыалларга дьиэ атыылаһарга эбэтэр туттарга социальнай төлөбүрү оҥорор. Онуоха дьиэ кэргэн олорор усулуобуйатын тупсарыыга наадыйарынан билиниллибит уонна ипотека кирэдьиитин эбэтэр бэйэ күүһүнэн толунар кыахтаах буолуохтаах.

Социальнай төлөбүр кээмэйэ икки көрүҥҥэ арахсар: оҕото суох ыалларга дьиэ сыанатын 30% көрүллэр, биир уонна онтон элбэх оҕолоох толору уонна толорута суох ыалларга – 35%.

Сиһилии информацияны Дьиэ-уот сыһыаннаһыыларыгар департаментан билсиэххэ сөп, диэн Дьокуускай куорат Олохтоох дьаһалтатын пресс-сулууспата иһитиннэрэр.

Аадырыһа: Дьокуускай к., Дзержинскэй уул., 21, 13 №-дээх кабинет  (тус сыаллаах бырагыраамалар салаалара).

Үлэлиир бириэмэлэрэ: Бэнидиэнньиктэн сэрэдэҕэ диэри сарсыарда 09.00 чаастан күнүс 12.15 чааска диэри.

Төлөпүөннэрэ: (4112)22-60-18, djoyakutsk.ru (саайтка «Отдел целевых программ» түннүк).