Эдэр скульптордар күрэхтэстилэр

Ааспыт ыйы түмүктүү М.П. Максимов аатынан Бүтүн Арассыыйатааҕы VII «Мы – дети Севера» мууһунан, хаарынан оҥоһуктары чочуйааччылар күрэстэрэ буолан ааста.

 Куонкурус икки түһүмэҕинэн ыытылынна: муус уонна хаар оҥоһуктарга. Муус скульптуралары чочуйууга кыттааччылар Аҕа дойду Улуу сэриитигэр Кыайыы 80 сыла тиэмэҕэ үлэлээтилэр. Оттон куонкурус иккис түһүмэҕэр кыттааччылар хаар скульптураны көҥүл тиэмэҕэ оҥордулар.  Куонкуруска Дьокуускай, Новосибирскай, Хабаровскай куораттартан, Приморскай кыраайтан, өрөспүүбүлүкэ араас улууһуттан барыта 16 хамаанда кытынна.

Куонкурус түмүгэр кыра саастаах бөлөххө хаар скульптуралары оҥорууга кыайыылааҕынан Чурапчы улууһуттан Николай Красильников уонна Радомир Васильев «Балыксыттар» композициялара буолла. Салайааччылара – Василий Назаров. Оттон бу түһүмэххэ аҕа саастаах бөлөххө П.П. Романов аатынан Дьокуускайдааҕы художественнай училище устудьуоннара Любовь Саввина уонна Снежана Попова (сал. Алексей Капитонов) «Замуррчательные забавы» үлэлэринэн кыайыылаах таҕыстылар.

Муус оҥоһукка кыра саастаах бөлөххө Л.А. Ким аатынан Дьокуускайдааҕы оҕо уруһуй оскуолатын үөрэнээччилэрэ Иустин Емельянов уонна Петр-Быйаман Еремеев (сал. Николай Колодезников) «Непотопляемый» муус скульптуралара бастаата. Муус оҥоһукка аҕа саастаах бөлөххө инники күөҥҥэ Дьокуускайдааҕы уруһуй оскуолатын үөрэнээччилэрин хамаандата, салайааччы Дмитрий Максимов, «Кыайыы вальса» үлэлээх Виталина Николаева уонна Елизавета Васильева таҕыстылар.

«Мы — дети Севера» куонкурус быйыл номнуо сэттис төгүлүн ыытылынна.

Куонкуруһу тэрийээччилэринэн Дьокуускай куорат дьаһалтата уонна «Северная сияние» муус паарката буолаллар.

Хаартыска:
«Якутск» тг-ханаалтан