Эдэр көлүөнэ кыттыыта көрөөччүнү сэргэхситэр

Бастыҥ испэктээкили туруорбут режиссерга Д.Ф. Наумов тус бэйэтэ быйыл сэттис төгүлүн 100 тыһ. солк. туттарда. Ол курдук, норуот суруйааччытын бириэмийэтин хаһаайынынан Үөһээ Бүлүү оройуонун И.С. Семенов аатынан «Олоҥхо» норуот тыйаатырын эдэркээн режиссера Сайыына Васильева («Төлөннөөх сүрэх модун санаата») ааттанна.

Икки күн тыйаатыр искусствотын сэргээччилэр анаан-минээн оҥостон кэлэн, араас улуустар туруорууларын буор босхо, аһыы-аһыы, сынньана-сынньана, астына-дуоһуйа көрдүлэр.
Бу сырыыга «Киин куорат» оҕо аймах, эдэр ыччат кыттыытын сэргээтэ.

Өрөспүүбүлүкэ үрдүнэн 55 норуодунай диэн ааттаах тыйаатыр баарыттан оҕолор оонньуур тыйаатырдара соҕотох, ол – Майатааҕы Эдэр көрөөччү тыйаатыра.
Кинилэр өрөспүүбүлүкэ таһымнаах «Режиссердар күөн күрэстэригэр» бастакы сүрэхтэниилэрэ буолла.

Александра Скрябина, Т.Р. Афанасьева аатынан Майатааҕы норуодунай Эдэр көрөөччү тыйаатырын режиссера:

– Тыйаатырбытыгар уопсайа 100-тэн тахса оҕо дьарыктанар. Бу «Режиссердар күөн күрэстэригэр» Майатааҕы И.Г. Тимофеев аатынан лицей 6-с кылааһын оҕолорун «Кэҕэ» испэктээкиллэринэн кэллибит.
Оҕолору кытта үлэлиирбин сөбүлүүбүн. Олус баай фантазиялаахтар, кэрэ ыралаахтар, айылҕаттан артыыстар. Тыйаатырга дьарыктанар оҕо төгүрүччү сайдар, кыбыстыбат, санаатын этэр буоларга үөрэнэр.

Светлана Егорова, Майатааҕы И.Г. Тимофеев аатынан лицей 6-с кылааһын салайааччыта:
– Мин санаабар, оҕо испэктээкилгэ оонньоон эргиччи сайдар, арыллар. Кылаас салайааччытын быһыытынан, 24 оҕом бары ситиһиилээх буолалларыгар араас ньыманы туттабын. Оҕолор билигин бэйэлэрин көрдөнө, талааннарын, дьоҕурдарын арыйа сылдьар саастара.
Биһиги кылааһынан Эдэр көрөөччү тыйаатырыгар дьарыктаммыппыт иккис сыла. Бу күрэххэ аҕалбыт «Кэҕэ» остуоруйабыт оҕону иитиигэ улахан суолталаах. Холобур, бэйэ-бэйэҕэ үтүө сыһыан баар буолуохтаах диэн өйдөбүлү тириэрдэр.

Ыраах айаны айаннаан кэлбит кыттааччыларынан Үөһээ Бүлүү икки норуодунай тыйаатыра буолаллар. Испэктээкиллэрэ дьиҥнээх олохтон ылыллыбыт түгэннэри, дойдум үлэһит, хорсун дьонун кэпсиир, үйэтитэр дьоһун ис хоһоонноохтор. Ол курдук, 100 тыһ. солк. Бириэмийэни ылбыт испэктээкиллээх режиссер Үөһээ Бүлүүттэн бэйэтиттэн кэлбит буоллаҕына, Ороһуттан Сахаайта Мойтохонова ааптардаах, Розалия Акимова режиссердаах «Киристиин» испэктээкили аҕалбыттар. Манна оҕолор, ыччат дьон оонньообуттара үүнэр көлүөнэ искусство бу хайысхатын сэҥээрэрин чаҕылхайдык туоһулаата.

Галина Котоконова, «Киристиин» испэктээкил сүрүн дьоруойун төрөппүт кыыһа:
– Ийэм Антонова Христина Михайловна, 4 тыһыынчалаах кирбиини ылан Ленин уордьана наҕараадалаах ыанньыксыт, биригэдьиир туһунан испэктээкили туруорабыт диэбиттэригэр, олус үөрбүтүм. Уонна тута сөбүлэһэн, тэҥҥэ үлэлэһэн, ийэм кэппит таҥаһын, туттубут малын туох наада буоларынан булан, тиксэрэн барбытым.

Бэйэм 2001 сылтан көрүүтэ-истиитэ суох хаалбыт оҕолорунан дьарыктанан, уопсайа 9 оҕону олох киэҥ аартыгар атаардым. Билиҥҥи оҕолорум бу испэктээкилгэ ситиһиилээхтик кытыннылар.
Оҕолор айаны, тэрээһини олус астыннылар, ордук маастар-кылаастары сэргээтилэр. Улахан артыыстардыын, бу күрэҕи өрүү ыытар норуодунай суруйааччы Миитэрэй Наумовтыын көрүстүлэр (Кини сопхуоска үлэлииригэр ийэм элбэхтик алтыспыт салайааччыта этэ). Оҕолорум бэркэ арыллан оонньоотулар, дьоруойдарын уобарастарын көрөөччүгэ толору арыйдылар. Киһи уйадыйар түгэннэрин итэҕэтиилээхтик толордулар.
Бэлиэтээн эттэххэ, бу испэктээкилгэ ийэм хаан-уруу сиэннэрэ Илья Котоконов, Юрий Афанасьев, хос сиэннэрэ Витя Котоконов, Максим Иванов, сиэн кийиитэ Наталья Котоконова кыттыбыттара улахан суолталаах.
Онон, ийэм олоҕун сырдатар, үйэтитэр үлэ турбутугар Ороһум кулуубун кэлэктиибигэр,  норуот артыыстарыгар улахан махталбын тиэрдэбин.
Махтанабын Дмитрий Федосеевич Наумовка, маннык баай, дириҥ ис хоһоонноох испэктээкиллэри туруорар режиссердарга болҕомто уурар суруйааччыга.

Дьэ маннык икки күн устата үгүс кыттааччыны, көрөөччүнү түмэр «Режиссердар күөн күрэстэрэ» күрэх үрдүк таһымнаахтык буолан ааста.