Эдэр худуоһунньуктар быыстапкалыыллар

Муус устар 18 күнүгэр Дьокуускайга баар Арассыыйа худуоһунньуктарын сойууһун «Арт-Ситим» галереятыгар «Саҥалыы көрүү 2.0» («Новый взгляд 2.0») диэн Арассыыйа худуоһунньуктарын сойууһун чилиэннэрин сонун үлэлэрин көрдөрөр хомуур быыстапка үөрүүлээх арыллыыта буолла.

Ол курдук, 2023 с. Сойууска киирбит, идэтийбит худуоһунньуктар Василий Камшилин, Мира Аргунова, Күннэй Иванова – Йэн Сур, Айылҕаана Понохова, Николай Григорьев уонна Мария Мищенко айан, дьүһүйэн таһаарбыт үлэлэрин манна туруордулар. 40 айымньы баарыттан сорох өттө – бастакы сүрэхтэниилэрэ.

Киириитэ – босхо. Галерея Белинскэй уул., 44 нүөмэригэр, иккис этээскэ баар. Быыстапка ыам ыйын 15 күнүгэр диэри туруоҕа. Сылдьа илик дьон, манна кэллэххитинэ, эдэр худуоһунньуктар живописька, графикаҕа үлэлэрин, декоративнай-прикладной ускуустуба оҥоһуктарын билсиэххит, сэргиэххит. 

Хаартыскалар: Ааптар түһэриилэрэ