Эдэр эмчиттэн ыйыт

Кини дьон-сэргэ доруобуйатыгар болҕомтолоох буоларын, үлүбээй “макаарданан” туругун айгыраппатын туһугар быһаарар, өйдөтөр үлэни ыытарын хайгаан кэпсэтэргэ быһаарбытым.
Аһаҕас-сайаҕас саха эмчит кыысчаана, өйдөнүмтүө буоллун диэн, дьиҥ олоххо көрсүбүт түгэнигэр олоҕуран, доҕор-атас дьонугар курдук судургу тылынан кэпсиирэ дьоҥҥо ордук тиийимтиэ эбит.
 

Киһи ыт-куоска буолбатах
 

Холобур, биир пациенката: “Биир быраас, искэр үөннээххин диэн, бу маннык эми сүбэлээбитэ”, – диэн үөн түһэрэр эми аҕалан көрдөрбүт. Онуоха кини, биллэн турар:
– Үөннээххин хайдах, тугунан диагностикалаата?” – диэн ыйыппыт. Онто туох эрэ аппараакка түһэрбитин, үөннэр баалларын көрдөрбүтүн туһунан эппит.
Сардаана:
– Ханнык да аппараат искэ үөн баарын көрдөрбөт. Биһиэхэ искэ үөн баарын-суоҕун саах анаалыһа (кал на яйцеглист) эрэ чопчу көрдөрөр. Киһи оннук анаалыһы туттарбакка, сэрэххэ эрэ диэн (без показаний, для профилактики), үөн түһэрэр эми иһиэ суохтаах.
 Киһи – ыт да, куоска да буолбатах. Арай кыылларга эрэ оннук эмп ананыан сөп, – диэн быһаарар.

Макаарданымаҥ!

Аны, биир дьахтар хаанын баттааһына хамсыыр, түһэр-тахсар эбит. Оннук кыһалҕаланан, ватсап нөҥүө быраас булан, тымырын ыраастата сылдьарын кэпсээбит. Ол тугунан ыраастыырын туоһуласпыта, инсуллаабыт дьоҥҥо ананар “Ц...” диэн ноотропнай эмп үһү. Дьахтара хайыы үйэ үс куурсу ааспыт буолан соһуппут. Биир куурсугар 3 тыһ. солк. төлөөн, уопсайа 9 тыһ. солк. ыыппыт.
Этэр:
– Тымыры ханнык да эмп ыраастаабат. Тымыр бляшкатын турба бөҕүн (засор) курдук хайдах да ыраастаан кэбиспэккин.
Арай микроангихирурдар эпэрээссийэ оҥорон, анал инструменнары туһанан, ыраастыахтарын сөп. Ону да, инсуллаабыт, инфарктаабыт ыарыһаҕы. Итинник ыарыы саҕаламматын туһугар эрдэттэн сэрэтии быһыытынан статиннары аныыбыт.
Салгыы сүбэлиир:
– Киһи чэгиэн буолар туһугар сөпкө уонна кэмигэр аһыы, этин-сиинин хамсата, эрчийэ сылдьыахтаах. Арыгы, табах курдук куһаҕан дьаллыктан ааккастаныахтаах.

Күндү ааҕааччы, терапевт- быраас эмтиир ыарыыларыгар сыһыаннаах ыйытыктаах түгэҥҥэр бу матырыйаал анныгар суруй. Сардаана Семёновна хардатын оптуорунньук күн бэчээттиэхпит.