Эдэр чинчийээччилэр форумнара ыытыллыаҕа

Ахсынньы 11 күнүгэр киин куоракка Саха сирин биллиилээх судаарыстыбаннай, политическай уонна уопсастыбаннай диэйэтэлэ Гавриил Иосифович Чиряев төрөөбүтэ 100 сылыгар аналлаах «Шаг в будущую профессию» эдэр чинчийээччилэр XIX форумнара ыытыллыаҕа.

Тэрээһин Т.Г. Десяткин аатынан Дьокуускайдааҕы промышленнай техникум базатыгар буолуоҕа. Форум чэрчитинэн Өрөспүүбүлүкэтээҕи интэриниэт-олимпиада, урбаан бырайыактарын көрөр күрэх, «Эдэр маастар» медиа-куонкурус, «Лидер бережливости. Студенческая лига» өрөспүүбүлүкэтээҕи күрэх, «Лидер бережливости-2025» бырайыак көҕүлээһиннэрин күрэҕэ ыытыллыахтара.

Форум тутаах тэрээһининэн экономика уонна социальнай эйгэ тыын суолталаах хайысхаларын хабар научнай-практическай конференция буолуоҕа. Cүүмэрдиир түһүмэххэ 45 үөрэх тэрилтэтиттэн (ол иһигэр 43 – Саха сириттэн, 2 – Москваттан) барыта холбоон 486 үлэ киирбит.

Ордук элбэх сайаапканы ыыттылар:

• И.И. Фадеев аатынан Үп-экономика колледжа;

• Н.Г. Чернышевскай аатынан Бүлүүтээҕи  педагогическай колледж;

• В.А. Вонгродскай аатынан Дьокуускайдааҕы медицинскэй колледж;

• Т.Г. Десяткин аатынан Дьокуускайдааҕы промышленнай техникум;

• Ю.А. Готовцев аатынан Дьокуускайдааҕы сервис технологическай техникума;

• «Айар Уустар» креативнай индустрия колледжа;

• «Айтыын» сыыппара технологиятын колледжа;

• С.Ф. Гоголев аатынан Дьокуускайдааҕы педагогическай колледж;

• М.Н. Донская аатынан Инбэлииттэри профессиональнай уонна медицина-социальнай өттүнэн чөлгө түһэрэр өрөспүүбүлүкэтээҕи интэринээт-техникум.

Санатан эттэххэ, 2022 сылтан «Шаг в будущую профессию» форум чэрчитинэн ыытыллар НПК кыайыылаахтара уонна бириистээх миэстэлэргэ тиксибиттэр Арассыыйа үрдүк үөрэх кыһаларыгар туттарсалларыгар эбии баал көрүллэр.

Хаартыска: irposakha14.ru саайтан