Эдэр артыыстар Кытайдарыгар төннөөрү сылдьаллар

Анастасия Тарасова, учуутал:

- Саха циркэтэ учуутал көрдүүр диэни истэн, кастинг ааһан, үлэлии киирбитим. Куонкуруһу сүүрбэ оҕо ааспыта. Бастаан «кырачаан баҕайылар» дии санаабыт оҕолорбун, үчүгэйдик билсэн баран, санаабын уларыппытым. Хас биирдиилэрэ наһаа маладьыастар! Күүстээх санаалаах, бигэ сыаллаах-соруктаах буолан, дьиэлэриттэн ыраах тэйбиттэрин, туора-туспа омук усулуобуйатын чэпчэкитик аһараллар эбит.

Ол курдук, алтынньы ыйга сиэтиспитинэн бары билбэт тылбытынан саҥарар тас дойдуга айаннаабыппыт. Бастаан тиийэрбитигэр Александр Посельский сиэтэн илдьэн, барытын кэпсээн, билиhиннэрэн, көрдөрөн хаалларбыта.

Оскуолабытыгар бары кытайдыы кэпсэтэллэр. Биhиги тренербит, хата, кыралаан английскайдыы саҥарар буолан, уопсай тылы түргэнник булбуппут. Ыксалга төлөпүөн тылбаасчыта улаханнык абырыыр.

Нэдиэлэҕэ икки күнүн үөрэхпитигэр аныыбыт. Кытай тылын нэдиэлэҕэ түөрт күн үөрэтэбит. Бастаан бэйэбит икки ардыбытыгар наар нууччалыы кэпсэтэрбит. Онтон, сүбэлэһэн баран, өрөбүл күнү сахабыт тылыгар анаабыппыт.

Оҕолор саастарынан тэҥ буоланнар, начаас бэйэ-бэйэлэрин кытта бодоруспуттара.

Арай бастаан утаа астарын дьиктиргээбиттэрэ. Биллэн турар, дьиэлэрин, дойдуларын, дьоннорун ахталлара ханна барыай. Киэһэтин олорон, хосторбутугар мустан кэпсэтээччибит.

Оҕолор билигин үөрэҕи, билиини түргэнник ылынар саастарыгар сылдьар буоланнар, улахан ыарахаттары көрсүбэппит. Билигин бу тохсунньу, олунньу ыйдарга каникулга кэлэ сылдьабыт. Кулун тутар саҕаланыыта төннөбүт. Хата, номнуо дьарыктарын ахтан эрэллэр, Кытайбытыгар баралларын күүтэллэр.

Манна төрөппүт оруола, оҕо иннигэр сыал-сорук туруорара эмиэ оруоллаах дии саныыбын.

Биһиги, учуутал, иитээччи дьон, төрөппүттүүн ыкса сибээһи тутабыт, мэлдьи аһаҕаспыт.

Саха сирэ Кытай циркатыгар бу төрдүс бөлөҕү үөрэттэрэ сылдьар. Аны түөрт сылынан бу кырачааннарбытын Саха циркэтин аренатыгар көрүөхпүт турдаҕа!