Эдэр ааҕааччылар ааптар хараҕын арыйдылар

Бүгүн, кулун тутар 13 күнүгэр, Дьокуускай куорат 12-с №-дээх орто оскуолатыгар СӨ үөрэҕириитин туйгуна, «Чолбон» сурунаал Алампа аатынан бириэмийэтин лауреата Наталия Рязанская кэпсээннэринэн куораттааҕы Ааҕааччы кэмпириэнсийэтэ буолан ааста.

Быйыл төрдүс төгүлүн ыытыллыбыт тэрээһин далааһына кэҥээн, куорат таһымыгар таҕыста. Ол курдук, бүгүҥҥү түһүлгэҕэ 12-с, 6-с, 26-с №-дээх оскуолалар, «Айыы Кыһата» гимназия үөрэнээччилэрэ кытыннылар. Тэрээһин үс хайысханан ыытылынна.

Ааҕааччы кэмпириэнсийэтигэр үрдүкү кылаас үөрэнээччилэрэ суруйааччы кэпсээннэрин ырытарга холоннулар. Манна кыттааччылар ааҕар, анаарар, санааларын сайа этэр, кэпсиир дьоҕурдарын көрдөрдүлэр.

12-с №-дээх оскуола 11 «Б» кылааһын үөрэнээччилэрэ эксээмэннэргэ бэлэмнэнии саҕана быыс булан кыттыбыттара хайҕаллаах. Ол курдук, Артём Наумов Наталия Рязанская кэпсээннэриттэн бэргэн этиилэри булан, тиэмэлэринэн наардаан ырыппыт. Манна тиэкиһи кытта үлэ үгүс сыраны, сыныйан ааҕыыны эрэйэрин этэр тоҕоостоох. Артём бу сыалын-соругун бэркэ ситиспит. Паша Иванова ааптар айымньыларын ааттарын үөрэппит, ону эмиэ туспа тиэмэлэргэ араарбыт. Эдэр ааҕааччы: «Бэртээхэй да айымньы, аатын таппатахха, ааҕыллыбакка хаалыан сөп», – диэн олус бэргэнник эттэ. Уйгун Петров Наталия Рязанская «Бэлисипиэт» кэпсээнигэр символ уобарастары хото туттубутун кэпсээтэ. Кини саха суруйааччыларын айымньыларыгар символ уобарастар үксүн айылҕа көстүүлэрин нөҥүө бэриллэллэрин тоһоҕолоон бэлиэтээтэ. Ааҕааччы хас биирдии этиитин айымньыттан холобурдарынан бигэргэттэ. 

Манна даҕатан эттэххэ, «Бэлисипиэт» кэпсээн «Киин куорат» хаһыакка былырыын тохсунньуга бэчээттэммитэ. Ону 12-с №-дээх оскуола үөрэнээччилэрэ олус сэргээн, ытыы-ытыы аахпыттар этэ.

Ааҕааччыны уйадытар айымньы устуоруйата маннык. Бу ааспыт үйэ 80-с сылларыгар Нам улууһугар дьиҥ олоххо буолбут түгэни ааптар дьүөгэтиттэн истэн, сүрэҕэр олус чугастык ылынан, кэпсээн суруйбут эбит.

«Предмет, баҕар, мал да буоллун, кимиэхэ эрэ олоҕун суолтата буолуон сөп. Киһи ханна да сылдьан туохха барытыгар болҕомтолоохтук сыһыаннаһыахтаах. Олоххо араас түгэн быыкаа бытархайдартан турар», – диэтэ Наталия Константиновна.

Уопсайынан, бу айымньы киэҥ сэҥээриини ылбытын кэмпириэнсийэҕэ элбэх кыттааччы кэлбитэ туоһулуур. Бу кэпсээнинэн 6 №-дээх оскуола 9 «В» кылааһын үөрэнээччитэ Айыына Брызгалова оҥоһуу өй көмөтүнэн презентациятын олус бэркэ киэргэппитин кэрэхсээтибит. Оттон Аэлита Борбуева (9 «Б» кылаас, 12-с оскуола) айымньыны иҥэн-тоҥон илдьириппитин хайҕаатыбыт.

Кыттааччылар ааптар атын да айымньыларын бэркэ ырыппыттар.  Нарияна Попова, Сайаана Брызгалова (9 «Б» кылаас, 12-с оскуола) «Хачыал» кэпсээҥҥэ символ суолтатын дириҥник хорутан чинчийбиттэр. 10 «В» кылаас үөрэнээччитэ Влад Боескоров «Икки ытыс кистэлэҥэ» кэпсээни ааҕан, хардата суох таптал даҕаны үйэлээх буолар диэн түмүккэ кэлбит.  

Ньургуйаана Керемясова (9 «в» кылаас, 12-с оскуола) «Сөллүбүт этэрбэс» айымньыны сиһилии үөрэппит.   

Ааптар хас биирдии кыттааччыттан кэпсээн ис хоһоонун төһө өйдөөбүтүн сураста, ааҕааччыларын санааларын болҕойон иһиттэ. «Мин айымньыларбынан маннык хабааннаах кэмпириэнсийэ тэриллэ илик, бу бастакытын буолла», – диэн долгуйбутун биллэрдэ.

Дьүүллүүр сүбэ быһаарыытынан Муҥутуур кыайыылааҕынан Уйгун Петров ааттанна. Атын кыттааччылар үс бириистээх миэстэни үллэһиннилэр.

Билиилэринэн сөхтөрдүлэр

7-8 кылаастарга квиз-оонньуу бэрт сэргэхтик ааста. Алта түһүмэхтээх күрэс кыттааччылар төһө болҕомтолоохтук аахпыттарын тургутар уоннуу ыйытыылаах. Барыта 60 боппуруос!  Дьэ, чахчы, айымньыны, этэргэ дылы, баһыттан атаҕар диэри сыныйан аахпыт оҕо эрэ хоруйдуур кыахтаах. Кыттааччылар киэҥ билиилэринэн барыбытын да сөхтөрдүлэр.

Манна «Балыыҥкалар» хамаанда (соһуйумаҥ, суруйааччы айымньытын аатынан) тэҥнээҕин булбата – бастакы үрдэлгэ эрэллээхтик таҕыста. Иккис миэстэҕэ «Оҕо саас» хамаанда тигистэ. Үһүс бочуоттаах миэстэни «Икки ытыс кистэлэҥэ» хамаанда ылла.

Үһүс хайысха – Наталия Рязанская кэпсээннэринэн уруһуй күрэҕэ. Манна оҕолор харандаас, киистэ, акварель көмөтүнэн талан ылбыт айымньыларын тиэмэтин арыйарга холоннулар.

Дьүүллүүр сүбэ бастыҥнары бу курдук быһаарда:

I миэстэ – Дайаана Эверстова, 7 «В» кылаас, 6-с №-дээх оскуола;

II миэстэ – Анелия Ноговицына, 6 «Б» кылаас, 12-с №-дээх оскуола;

III миэстэ – Санаайа Хабарова, 5 «Б» кылаас, 6-с №-дээх оскуола.

Наталия Константиновна Рязанская, СӨ үөрэҕириитин туйгуна, Алампа аатынан бириэмийэ лауреата:

– Оҕолор кинигэни аахпат буолбуттара – билиҥҥи олоххо баар суол. Ол эрээри бүгүн куорат оҕолоро сахалыы ааҕалларыттан, айымньыны дириҥник ырыталларыттан сөхтүм, соһуйдум. Эдэр ааҕааччылар харахпын арыйдылар, кинилэр санааларын истэр олус интэриэһинэй эбит. Наһаа үчүгэй тэрээһин буолбутуттан суруйар киһи кынаттанным. 

Түгэнинэн туһанан, ааптар ааҕааччыларын муус устар 3 күнүгэр «Айар» кинигэ кыһатыгар автограф-сессияҕа ыҥырда.   

Көҕүлээччи, тэрийээччи, саха тылын уонна литературатын учуутала К.Б. Ксенофонтова:

– Билиҥҥи оҕо аахпат кэмигэр оскуолабытыгар Ааҕааччы кэмпириэнсийэтин төрдүс төгүлүн ыыттыбыт. Бу иннигэр аныгы кэм суруйааччылара Оксана Манчурина, Надежда Егорова-Намылы, Ангелина Васильева-Дайыына айымньыларынан буолбута. Быйыл бастакытын куорат таһымыгар ыытан холоннубут. Элбэх идиэйэлээх, өрүү сүүрэн-көтөн күүс-көмө буолар бибилэтиэкэрбэр Христина Петровна Павловаҕа, биир идэлээхпэр Евгения Федосьевна Керемясоваҕа махталым муҥура суох.