Эбийиэктэри тупсаҕай көстүүлээх оҥорууга куоластааһын саҕаланыа

Эбийиэктэри тупсаҕай көстүүлээх оҥоруу куоластааһыныгар Дьокуускай 8 уопсастыбаннай туоната киирдэ.
Дойду хас биирдии олохтооҕо муус устар 21 күнүттэн бэс ыйын 12 күнүгэр диэри куоластааһыҥҥа кыттан, куорат эйгэтин тупсаҕай оҥорууга тус кылаатын киллэрэр кыахтаныа.
Тупсарыллыахтаах эбийиэги талар куоластааһын – хас биирдии гражданиҥҥа олорор куоратын тас көстүүтүгэр тус сыһыанын көрдөрөрүгэр, кылаатын киллэрэригэр кыаҕы арыйар. Чопчу маннык хабааннаах көҕүлээһиннэринэн Дьокуускай куораппыт сыллата тупсар, кэрэхсэбиллээх көрүҥнэнэр.
Бу сылга куоластааһыҥҥа куорат 8 эбийиэгэ киирдэ. Балар истэригэр дьон билэр, ордук таптаан сылдьар туоналара. Испииһэккэ бастакынан саҥардыллара ирдэнэр, Дьокуускай биир киэргэлэ буола тупсар кыахтаах Юрий Алексеевич Гагарин аатынан сквер киирдэ. Иккис эбийиэк – Ржев аннынан охтубут Саха сирин буойуттарыгар аналлаах сквер. Бу харыстабыллаах уонна ытыктабыллаах сыһыаны эрэйэр мемориал сири тупсаҕай оҥоруу дьоруойдар ааттарын үйэтититии, ытыктабыл бэлиэтинэн буолуо. Испииһэккэ салгыы үс кытыл сир киирдэ: Николай Щорц аатынан кытыл уонна Теплое, Белое күөллэр кытыллара. Маны таһынан тупсарыыга куоластааһыҥҥа атын да дьоһун суолталаах эбийиэктэр киирдилэр: Тутааччылар сквердэрэ, Сэргэлээх күөл кытыла, "Обнаженные сердца" сквер.
Куоластааһын 14 сааһыттан үөһээ саастаах Саха сирин олохтоохторугар Госуслуги порталга аһыллыа.
Куорат дьаһалтата муус устар 21 күнүттэн бэс ыйын 12 күнүгэр диэри куоластааһыҥҥа кыттыҥ диэн ыҥырар.