Эбии сүүстэн тахса саҥа оптуобуһу ылыахтара

Айсен Николаев кэнники сылларга өрөспүүбүлүкэ бырабыыталыстыбатын өйөбүлүнэн 124 оптуобус ылыллыбытын, Дьокуускайга үлэлээн саҕалаабыттарын туһунан иһитиннэрдэ. Оттон тохсунньу ыйга ВЭБ.РФ кытта холбоһуктаах бырагыраама көмөтүнэн эбии улахан кыамталаах 50 оптуобус кэллэ.

“Кинилэр хас да маршрутунан үлэлиэхтэрэ: икки маршрутка хас биирдиилэрэ уонча оптуобустаах буолуоҕа, оттон алта маршрутка биэс оптуобус сүүрүөҕэ. Салгыы куорат балаһыанньаны хонтуруоллуоҕа, наада буоллаҕына, оптуобустары хаттаан үллэриэҕэ. Бу оптуобустар дьон симиллэн айанныылларын биллэ аҕыйатыаҕа диэн эрэллээхпин, ордук киһи элбэхтэ сылдьар кэмигэр”, - диэтэ кини.

Саҥа оптуобустарга уруккулардааҕар икки төгүл элбэх пассажир киирэр кыахтаах. Айылҕа гааһынан үлэлииллэр, диэн Айсен Сергеевич бэлиэтээтэ.

“Бу бырагыраама салҕанан барыа диэн бигэ эрэллээхпин. Кэлэр сылларга өссө сүүстэн тахса оптуобуһу ылар былааннаахпыт”, - диэн Айсен Николаев тоһоҕолоото.

СИА, Дьулустаан Сергеев