Эһиилги Олоҥхо ыһыаҕа Кэбээйи улууһугар буолуоҕа

От ыйын 3-5 күннэригэр Нерюнгри «Таастаах» кэрэ-мааны сиригэр Улуу Кыайыы 80, Соҕуруу Саха сирин киин куората Нерюнгри төрүттэммитэ 50 уонна биллиилээх судаарыстыбаннай уонна политическай диэйэтэл Гавриил Чиряев төрөөбүтэ 100 сылларыгар аналлаах XVIII Олоҥхо ыһыаҕар Дьокуускай куораттан уонна өрөспүүбүлүкэ 16 улууһуттан 200-тэн тахса олоҥхону толорооччу кыттыыны ылла.

 
Кинилэр ортолоругар урукку Олоҥхо ыһыахтарын Гран-при кыайыылаахтара Мэҥэ Хаҥаластан Петр Тихонов (2013), Уус Майаттан Валентин Исаков (2014), Чурапчыттан Николай Григорьев (2018), Анатолий Христофоров, Намтан Лена Маркова 2019), Тааттаттан Алексей Николаев (2024) уонна араас таһымнаах күрэхтэр лауреаттара, дипломаннара бааллара.

Дьүүллүүр сүбэ быһаарыытынан быйылгы Гран-при хаһаайынынан улахан дьоҥҥо Чурапчы улууһуттан Сусанна Лазарева ааттанна, ыччаттарга Мэҥэ Хаҥаластан Станислав Иванов буолла. 

Санатар буоллахха, Гран-при бириэмийэ кээмэйэ улахан дьоҥҥо – 700 тыһ. солк.; ыччаттарга – 300 тыһ. солк.; оҕолорго – 100 тыһ. солк.; бөлөҕүнэн толоруу уонна импровизация күрэҕэр – 50 тыһ. солк.
Оттон оһуохай этиитигэр кыайыылааҕынан Ньурба улууһуттан Розалия Тихонова тахсан, 100 тыһ. солк. кээмэйдээх сэртипикээт хаһаайына буолла. 
Хомусчуттар күрэхтэрин кыайыылааҕа Бүлүүттэн Айаал Дмитриев үрүҥ көмүс хомуһунан бириэмийэлэннэ. 

Олоҥхо ыһыаҕын үөрүүлээхтик сабыы церемониятыгар Нерюнгри оройуонун баһылыга Роман Щегельняк Ытык Дуоҕаны Кэбээйи улууһун баһылыгын э.т. Александр Сивцевкэ туттарда. 
Санатар буоллахха, быйылгы Олоҥхо ыһыаҕар 70-тан тахса араас тэрээһин, ол иһигэр 47 күрэх ыытылынна. Ыһыаҕы арыйыы, сабыы церемонияларыгар 1,5 тыһыынча кэриҥэ киһи, ол иһигэр 250 идэлээх артыыс уонна устудьуоннар кыттыыны ыллылар. Бырааһынньыгы 17 этническэй түмсүү киэргэттэ. 
(Ил Дархан уонна Бырабыыталыстыба пресс-сулууспатын матырыйаалларынан.

Хаартыскалар: Нарыйа Пахомова уонна Саина Титова, СИА