Эһиил Парасковья Павловна төрөөбүтэ 100 сыла туолуоҕа

Онтон сэдиптээн бу сопхуос туһунан аҕыйах тылынан санатан ааһар оруннаах буолуоҕа. “Хатас” сопхуос 1960 сыллаахха РСФСР тыа хаһаайыстыбатын министиэристибэтин олунньу 25 күнүнээҕи, САССР Миниистирдэрин Сэбиэтин кулун тутар 17 күнүнээҕи 129 №-дээх бирикээһигэр олоҕуран төрүттэммитэ. “Дьокуускай” сопхуос биир отделениетын уонна Якутторг подсобнай отделениетын төрүтүгэр тэриллибитэ биллэр.

Сопхуос бастакы дириэктэринэн Леонид Павлович Расторгуев анаммыт. ППО сэкиритээринэн – Михаил Гаврильевич Черноградскай, рабочком бэрэссэдээтэлинэн Прокопий Прокопьевич Софронов үлэлээн саҕалаабыттар.

Биэс сыл иһигэр сопхуос хонтуоратын дьиэтэ, остолобуой, маҕаһыын, бибилэтиэкэ, почта отделениета уонна баанньык тутуулара дьэндэйэллэр. Нэһилиэнньэтэ да улаатан, 1535 киһи буолар. 386 хаһаайыстыбалааҕа уонна 264 олорор дьиэлээҕэ биллэр.

1964 сыллаахха ситэтэ суох оскуола 380 үөрэнээччилээх орто оскуола буола улаатар. 1966 сыллаахха бу үөрэх кыһатын бастакы 24 үөрэнээччи бүтэрэр. 1965 сылга уһуйаан саҥа тутуулунар...

Дьэ, туран, 1970 сыл ахсынньы 1 күнүттэн “Хатас” сопхуос дириэктэринэн дэгиттэр талааннаах, ирдэбиллээх уонна сиэрдээх салайааччы Парасковья Павлова Федорова ананан, 33 сыл дириэктэрдээбитэ.

Хара өлүөр диэри тапталлаах Хатаһын туһугар туруулаһа, сүбэ-соргу тылын үллэстэ олорбута.

Ытык киһибит өрөспүүбүлүкэ үрдүнэн сопхуоһу салайбыт соҕотох дьахтар дириэктэр буоларын ааһан, олоҕун дьон уонна уопсастыба туһугар анаабыт, чахчыта да, Хатаһы Хатас дэттэрбит кини буолар.

Бу санаан көрдөххө, эр дьон эрэ, ону да бары буолбатах, кыайа тутар муоһаларын аан бастаан ыларыгар кини баара-суоҕа 43 эрэ саастааҕа. Ол эбэтэр эһиил күһүн – 2027 сыл балаҕан ыйын 1 күнүгэр –  РСФСР, САССР норуотун хаһаайыстыбатын үтүөлээх үлэһитэ, “Хотугу сулус” уордьан кавалера, Дьокуускай уонна Мэҥэ Хаҥалас улууһун бочуоттаах олохтооҕо, ытык киһибит Парасковья Павловна төрөөбүтэ лоп курдук 100 сылын туолар.

Бу түгэн өрөспүүбүлүкэ таһымыгар бэлиэтэниэ, бэҕэһээҥҥи тэрээһин онно бэлэмнэнии тэҥэ буоллаҕа.