Эһээбит утума салҕанар

Эһэм Михаил Алексеевич 1910 сыллаахха Горнай улууһугар дьадаҥы дьиэ кэргэҥҥэ төрөөбүт. Дьоно эрдэ өлөннөр, эдьиийэ Матрена Алексеевна Кэбээйигэ ыал буолан балтын Аннаны,  быраатын Михаилы бэйэтин кытта илдьэ кэлбит. Горнайтан кэлэллэригэр Анна, Михаил Оленев диэн араспаанньалаахтар. Матрена кэргэнэ Степан Иванович Эверстов. Михаилы  Эверстов диэн суруйтарбыт. Эдьиийэ Матрена иитэн улаатыннарар.

Михаил 1932 сыллаахха «Кыһыл ыччат»  холкуос чилиэнинэн киирэн, холкуос бары үлэтигэр үлэлиир. Мэхээлэ сэмэй, сымнаҕас, туруу үлэһит буолан, дьон-сэргэ убаастабылын ылбыт.

1942 сыллаахха бэс ыйын 27 күнүгэр бастакы хомуурга Аҕа дойду Улуу сэриитигэр ыҥырыллан барбыт. Мэхээлэ 35 стрелковай полкаҕа 1942 сыл атырдьах ыйыттан 1944 сыл сэтинньи 5 күнүгэр диэри сылдьыбыт. Хаҥас санныгар ыараханнык бааһыран, дойдутугар 1946 cыллаахха төннөн кэлэн, «Кыһыл ыччат» холкуоска биригэдьииринэн үлэлиир.

Михаил Алексеевич ханнык да үлэттэн чаҕыйбакка, ыарыыга бас бэриммэккэ, бэйэтин харыстаммакка үлэлээбитэ. 1948 сыллаахха «Үлэҕэ килбиэнин иһин» мэтээлинэн наҕараадаланар. Бу сыл Эверстова Агафья Афанасьевналыын ыал буолар. Алеша, Коля диэн икки уол оҕолоноллор. 1952 сыллаахха ыарахан ыарыы кэнниттэн өлбүтэ.

Улахан уола, мин аҕам Кондаков Алексей Егорович, 10 оҕолонон, төрөөбүт нэһилиэгэр бастыҥ механизатор, 2021 сыллаахха «Ытык аҕа» бэлиэ хаһаайына. 2022 сыллаахха ыалдьан олохтон туораабыта. Аҕам быраата, Эверстов Николай Егорович, 5 оҕолонон, Горнай Маҕараһыгар бочуоттаах сынньалаҥҥа олорор.

Михаил Алексеевич сиэннэрэ, хос сиэннэрэ Кэбээйинэн, Үөһээ Бүлүүнэн, Тиксиинэн, Горнайынан олохсуйан, сөбүлүүр идэлэрин талан, үлэлии-хамсыы сылдьаллар.