Дзюдо уонна самбо саалата аһыллыаҕа

Бу туһунан куорат физкултуураҕа уонна спорка управлениетын начаалынньыга Эдуард Ефимов «Эхо столицы» эрэдээксийэтигэр иһитиннэрдэ.

«Бэдэрээтчит үлэтин туттарбыт, ол билигин терроризмы уонна баһаары утары хамыыһыйаны ааһар, үөрэхтээһин үлэтин туһунан лицензия бэлэмнэнэр. Былаан быһыытынан бу барыта ый бүтүүтэ түмүктэниэхтээх уонна сааланы тута арыйыахтаахпыт», – диэтэ Ефимов.

Саҥа саала 3 №-дээх Оҕо спорт оскуолатын филиала буолуоҕа, 700 кэриҥэ оҕону хабыан сөп.

Управление начаалынньыга кэпсээбитинэн, билигин оҕолор дзюдонан уонна самбонан 2-с уонна 6-с нүөмэрдээх оҕо спорт оскуолаларыгар дьарыктаналлар, ити ГРЭС уонна аэропорт оройуоннара. Куорат киинигэр саҥа саала аһылыннаҕына, оҕолор дьарыктаналларыгар быдан табыгастаах буолуоҕа уонна ордук элбэх спортсмен хабылларыгар көмөлөһүөҕэ.

600 кв. миэтэрэ иэннээх саала анал бүрүөһүнүнэн, тренажердарынан, о.д.а. толору хааччыллыылаах.