Джованна Арассыыйаны олус көрүөн баҕарар үһү

Джованна Антонелли диэн кимий? Билигин, арааһа, ахсааннаах киһи тута билэрэ буолуо. Оттон “Жадины өйдүүгүт дуу?” диэтэххэ, үгүс орто уонна саастаах көлүөнэ дьон сэгэс гына түһэллэрэ, “Клон” диэн Бразилия сэрийээлин тутаах дьоруойа, сулуһа буоларын этэллэрэ эрэбил. Бу санаатахха, доҕоттор, ол сэрийээл тэлэбиисэргэ көстүбүтэ хайыы сах үйэ чиэппэрэ буола охсубут!

Бэҕэһээ аҕай ССТА-ҕа Екатерина Мамедова, Габриэла Чалабова суруйуулара таҕыста.

"Клон" сэрийээл бэйэтин кэмигэр, XXI үйэ саҕаланыыта, норуоттар икки ардыларынааҕы хит буолбут киинэлэртэн биирдэстэрэ этэ. Оччолорго тутаах дьоруойу оонньообут Джованна Антонелли эдэр кэскиллээх артыыска быһыытынан биллэр эбит буоллаҕына, күн бүгүн – Бразилия киэҥник биллэр-көстөр дьахтара, биисинэс-ледитэ буолбут.

ССТА-ҕа биэрбит эксклюзив-интервьютугар “Клоҥҥа” оонньооһуна карьератыгар уонна тус олоҕор суолтатын, киинэҕэ партнера Мурилу Бенисуну кытта  уол оҕолоохторун уо.д.а. туһунан кэпсээбит.

Ону тэҥэ: “Ис сүрэхпиттэн эһиги дойдугутун көрүөхпүн баҕарабын. Чуолаан бу сыллар тухары эһиги миэхэ истиҥ сыһыаҥҥыт, тапталгыт иһин махтанаары. Билиҥҥэ диэри биһиги историябытын тоҕо эһиги олус чугастык ылыммыккытын олус билиэхпин баҕарабын. Мин нууччалыы билбэппин, ол гынан баран ити сэҥээриигит, уруулуу дууһалаах буоллахха, тылбаас да наадата суоҕун туоһулуур”, – диэбит.

*Умнубуттарга санатар буоллахха, “Клон” сэрийээл-мелодрама 2001 сылга саҕаламмыта. 93 дойдуга көстүбүт, ол иһигэр Арассыыйаҕа. Биһиги дойдуга хас да ханаал хатылаан көрдөрбүтэ суруллар. Бүтэһигэ былырыын көстүбүт үһү.

Джованна ити сэрийээлгэ устуу үгүс сыраны уонна уһун кэми ылбытын эппит. Буолумуна, 200-тэн тахса сиэрийэ – эттэххэ дөбөҥ. “Ити киинэнэн олорор курдук этибит. Атын култуураны үҥкүүтүгэр-битиитигэр, хайдах таҥаһы кэтэллэригэр тиийэ дириҥээн үөрэтэрбит. Саамай уустуга дууһа туругун (эмоция күүрүүтүн) наар тута сылдьыы, ис мөккүөр уустук сценаларын хос-хос эргиллэн кэлэ-кэлэ хатылааһын, ол иэйиитин билии этэ. Киинэбитин уста сылдьан, чахчы да, бары биир дьиэ кэргэн курдук буолбуппут”, – диэбит.

Джованна бэйэтэ саныырынан, мусульманка кыыс Жади уонна Бразилия улахан биллэр-көстөр, ыйааһыннаах тыллаах бизнесменин уола Лукас тапталларын историята дьоҥҥо барытыгар өйдөнүмтүө уонна универсальнай тиэмэни таарыйар, олоҕурбут үгэс уонна көҥүлгэ тардыһыы, ытык иэс уонна киһи ис баҕатын утарсыыта көстөр буолан, бүтүн аан дойду көрөҕччүтүн кутун туппут буолуон  сөп. Оттон киинэ сүгүрүйээччилэрэ ити сэрийээл бэйэтин кэмигэр төһө да саҥалыы тыыннаах сценарийдааҕын иһин, киинэ ситиһиилэнэригэр тутаах оруолу толорор Джованна Антонелли уонна Мурилу Бенисиу оруоллара улаханын бэлиэтииллэр.

Аны, бу икки эдэр дьон сыһыаннара Глория Перес суруйбут сценарийдаах экраҥҥа эрэ көстөр историянан муҥурдамматах. Бу оонньуу сылдьан, устунан бэйэ-бэйэлэрин таптаһан,  ыал буоларга быһаарбыттар. 2005 сыллаахха ол истиҥ, чугас сыһыантан уоллара Пьетро күн сирин көрөр.

Джованна: “Мурилу миэхэ бастакы уонна суос-соҕотох арамааннаабыт артыыһым этэ. Биһиги көрсүһүүбүт дьылҕа хаан ыйыытынан буоллаҕа. Бу орто дойдуга Петро төрүүр ыйааҕа тартаҕа. Уолбут биһиэхэ – ол кэм тутаах бэлэҕэ этэ”, – диэбит.

Ол гынан баран эдэр ыал тапталлара, хомойуох иһин, уһаабатах. Уоллара төрөөбүтүн кэнниттэн өр буолбакка арахсыбыттар.

Мурилу кэнниттэн Леонард Ногейро диэн режиссердуун холбоһон, 2010 сыллаахха София уонна Антония диэн игирэ кыргыттары оҕоломмут. Билигин Леонардыын дьоллоохтук олороллорун үллэстибит.

Артыыскаттан – урбааҥҥа эбэтэр Антонелли империята

“Биисинэскэ ситиһиим – мин титргэ аатым көстөрүнэн тохтообокко, туох эрэ улаханы баҕарыым түмүгэ диэм этэ”, – диир кини.

Ити этии мээнэ чабыланыы буолбатах. Суруйалларынан, күн бүгүн кини аата Бразилияҕа бэйэтэ бренд үһү. Лазернай эпиляция өҥөтүн оҥорор клиниканы арыйбыт. Онто Бразилия үрдүнэн 300-тэн тахса филиаллаах буола тэнийбит! Ону таһынан Антонелли аатынан парфюмерия арааһын, суумканы уонна ыраастыыр сириэстибэлэри таһаарар лииньийэлэр баар буолбуттар. Биисинэстээх леди этэр эбит: "Мин үлэни уонна олоҕу тус-туһунан туппаппын. Өйбүнэн-санаабынан өрүү даҕаны урбаанньыт этим уонна ис көрүүбэр олоҕуран карьерабын оҥосторум. Ол гынан баран миэхэ барыта судургутук табылларын курдук санаа – олоҕо суох. Оннук буолбатах”.

“Жади” социальнай ситимнэргэ страницатын күүскэ үлэлэтэр уонна киинэҕэ, сэрийээлгэ, рекламаҕа да салгыы уһуллар. Бэйэтэ билиммитинэн, кини 2023 сыллаахха Globo теле-ханаалы кытта хантыраагын олоччу быспыт. Бу –– бүтүн 23 сыллаах, тохтоло суох бииргэ үлэлэһии кэнниттэн. Кини этэринэн, кэлиэхтээх сырдык кэм туһугар сатаан арахса үөрэниэххэ наада.

Этэр эбит: "Эйиэхэ дьиэҥ тэҥэ буолбут, туруктаах уонна барыта өйдөнөр систиэмэттэн туһунан тахсан барыы – олус кутталлаах. Ол да буоллар сүтүгэ суох туох да саҥа, үүнүү табыллыбатын өйдүүр түгэним үүммүтэ. Онон чэпчэкитик уонна олус улахан махталлаах арахсыбытым. Мин мантан инньэ хаһан миигин талалларын күүппэппин. Билигин бэйэм талабын. Билигин оруолларбын бэйэм көрдүүбүн, бэйэм продюсердыыбын, бэйэм өйдөбүллэри олохтуубун. Оттон ол оонньуу быраабылатын уларытар”.

Артыыска быһыытынан ордук утарсар өрүттэрдээх, уустук характердаах дьоруойдары оонньууру ордорорун эппит. Оннук оруол “ис дууһам дириҥ түгэҕэр баар муннуктарга тиийэрбэр көмөлөһөр” диэн ааттыыр.

Суруйуу ааптардара ол да иһин Сэбиэскэй кэм режиссера Андрей Тарковскай туһунан кини үрдүк сыанабыллаах быһыылаах диэн сабаҕалаабыттар. "Андрей Тарковскай аата миэхэ сибэтиэй тэҥэ суолталаах, кинини бүтүн аан дойду үрдүнэн бэйэтин историятын уратытык кэпсээбитин иһин убаастыыллар. Ардыгар итинник маастардыын үлэлэһэр хайдах буолуой диэн, оҥорон, толкуйдаан көрөбүн. Нууччалыы дириҥээн (русская глубина) киирии уонна драматизм миигин абылыыр".
Бразилия артыыскатын уонна нуучча режиссерун кытта күүтүллүбэтэх өттүттэн сибээс баара этиллэр. Ол – Жади Urga диэн музыкальнай тиэмэтин оҥорбут нуучча электроннай муусукаҕа пионера, композитор Эдуард Артемьев Тарковскай бүтүн үс киинэтин муусукатын айан-тутан таһаарбыта буола (“Солярис”, “Зеркало” уонна “Сталкер” диэннэргэ).​​​​​​

Джованни олоҕу көрүүтэ (философията)

Бу быйыл Жадибыт артыыската лоп курдук олоҕун орто омурҕанын бэлиэтээбит. 50 сааһын туолбут.

Биир интервьютугар эппиттээх эбит: “Саас диэн – эйиэхэ иннигэр былааннааҕыҥ тухары – сыыппара эрэ”.

Хас биирдии ылсыбыт эйгэтэ кинини хайаан да туохха эрэ үөрэппитин бэлиэтиир эбит. Ол курдук, кини этэринэн, урбаан киниэхэ бэйэ бириэмэтин сыаналыы үөрэнэргэ, бэйэ ис кыаҕар тирэҕирэргэ, дьиҥ идэтийбит дьонунан бэйэни тулалыырга уонна суолтатын сүтэрбиттэн аккаастанарга үөрэппит. Оҕолонуу – туох хайа иннинэ бэйэҕэ эрэнэ үөрэнэргэ уонна тэтими арыый бытаарда түһэргэ. Оттон артыыс идэтэ – бэйэ сааһыгар уонна тас көстүү уларыйыытыгар сөптөөхтүк сыһыаннаһарга.

 “Кэми-кэрдиини кытта күрэстэһэр олох наадата суох, бириэмэни кытта тэҥҥэ барсыахха наада. Ону таһынан ис санаа, ис турук тугу этэрин сатаан иһиллэнэ үөрэниэххэ. Хаһан баҕарар бэйэни истиэххэ", – диэн тоҥоҕолоон бэлиэтиир эбит.

Төһө да мөлүйүөнүнэн көрөөччү кумира, сулуһа статустааҕын иһин, Джованна Антонелли көннөрү, боростуой дьонтон, кинилэр күннэтэ оҥорор кыра-улахан хорсун быһыыларыттан, олоххо дьулуурдарыттан көхтөнөр эбит. Төһө да дьахталлар кини макияһыттан саҕалаан толорор үҥкүүтүгэр тиийэ сүһэн ылалларын иһин, хаһан да бэйэтин истиил иконатабын диэн үйэлээх сааһыгар санамматах.

Эппит: “Мин хаһан да икона буоларга дьулуспатаҕым. Мин дьиҥ бэйэбинэн буоларга эрэ дьулуһарым. Арааһа, туох хайа иннинэ дьону ити – ис дьиҥинэн сылдьыы тардар, чугаһатар”.

Кэм-кэрдии ахсым ат айанынан көтүтэр. Көрөөччүлэр кумирдарын кытта тэҥҥэ сааһыраллар, өй-санаа, билии-көрүү да өттүнэн тэҥҥэ уларыйаллар. Онон хаһааҥҥыта эрэ сэргээн, күүтэн көрөр “Жадибыт” ханна тиийбитэ, төһө уларыйбыта, олоҕу көрүүтэ да хайдаҕа сэҥээрдиэ диэн, ССТА-ҕа тахсыбыт матырыйаалы билиһиннэрэргэ сананным. Эн, ааҕа олорооччу, “Клон” киинэ тутаах дьоруойуттан сэдиптээн, ааспыт кэмҥин хайыһан, анааран көр, сааһырдым диэн санаарҕаама, кини холобурунан былаанна-соргута ылынан ис.