Дьылдьыт муннуга: эмиэ сөрүүн, уһун саас иһэр

Хаарбыт, муус устар ый бүтүүтэ халлаан эмискэ ириэрэн, күүскэ ууллуоҕа. Онон, чуолаан, улуу эбэбит Өлүөнэ ууну хомуйар үрэҕэ-үрүйэтэ элбэҕэ уонна иэнэ киэҥэ бэрт буолан, сааскы уу балысханнык киллэриэ. Өрүскэ муус эриэннээн тоҥон, сорох сиринэн олус халыҥ дииллэр, улахан харыы тахсар чинчитэ баар. Эбэни күргэлиир төһө сөптөөҕүн дуу, сөрүөстүгэһин дуу быйылгы саас көрдөрүө. Өрүс кытылларыгар олорор дьон, халаан уутуттан сэрэхтээх буолуҥ, сылгыларгытын арыылартан эрдэ таһаарыҥ.

Илин эҥээргэ саас муус устар ый бүтүүтэ көхтөөхтүк кэлиэ. Сир ирбэт тоҥо эпсэри тоҥмут буолан, кэлбит уу түргэнник кууруо. Ыам ыйа сөрүүн, тымныы, хаҕыс буолуо. Кусчуттар эмиэ тоҥор-хатар саастара. Ол эрээри, эрэйдэрин төлөттөрүөхтэрэ, кус күргүөмүнэн кэлиэ. Ыам ыйын ортотугар ардах түһэн, сири сиигирдиэ. Кураанах кус ыам ыйын 17 күнүгэр диэри киирэн баран, аҕырымныа. Ичигэстик таҥнан, сылаас дурда туттан сыттаххытына, бултуйуоххут.

Улуу эбэ мууһа көтөҕүллүөр диэри сылаас күннэри күүтүмэҥ. Үөл кустар Ньукуолун саҕана биллиэхтэрэ, үгүстэрэ көҥүл бүппүтүн кэнниттэн кэлэн, сынньанан ааһыахтара. Кустааһын болдьоҕун саҕана үгүс күөл тоҥ сытыа, ырбыы эрэ тахсыа. Эбэбит ыам ыйын ортотун кэнниттэн сайыаҕа. Туллук үөрэ сорох сиргэ 50-нуу, 100-түү үөрдээх, оннук сирдэргэ кус көтөр суола арыллар.

Ньурбаҕа, Абыйга, Кэбээйигэ, Томпоҕо, Амма уҥуор, чугастыы Чурапчы Одьулуунугар, Чыччан сиһигэр куобах суола көстөр буолбут. Ол аата кураан буоларын биттэнэр. Онон куобахпыт 35 сыл эстэ сылдьан баран, эргиллиэн, үөскүөн сөп диэн күлүкпэр имнэнэбин.

Билгэбит төһөтө сөбүн айгыр-силик айылҕабыт бэйэтэ билэн турдаҕа.

Тиэкис: https://ulus.media/