“Дыгын оонньуулара-2025” кыттыылаахтара сэрэбиэй тартылар

Бүгүн, бэс ыйын 25 күнүгэр, “Сахамедиа” медиа-кииҥҥэ “Дыгын оонньуулара-2025” кыттыылаахтара оонньуу көрүҥнэринэн сэрэбиэй тартылар. Быйылгы үбүлүөйдээх күрэхтэһии Туймаада ыһыаҕар бэс ыйын 28-29 күннэригэр ыытыллыа.

Бүгүҥҥү тэрээһини олохтоох дьаһалта физическэй култуураҕа уонна спорка управлениетын начаалынньыга Эдуард Ефимов иилээн-саҕалаан ыытта.  Манна мустубут “Дыгын оонньууларын” кыттыылаахтарын, бэрэстэбиитэллэрин СӨ спорка миниистирэ Леонид Спиридонов оонньуу 30-с сылын ыытыллар бэлиэ түгэнинэн эҕэрдэлээтэ, маннык күрэхтэһиилэр саха төрүт оонньууларын сайыннарарга олук буолалларын бэлиэтээтэ.

Салгыы кылаабынай судьуйа Иван Горохов көрүҥнэринэн киирсии быраабылаларын сырдатта, туох уларыйыы киирбитин кэпсээтэ, спортсменнар чопчулаһар ыйытыыларыгар хоруйдаата.

Санатар буоллахха, быйылгы оонньуулар бириистэрин пуондата хаһааҥҥытааҕар да сөҕүмэр. Ол курдук, “Прогресс” ХЭУо генеральнай дириэктэрэ Алексей Пинигин, алтыс сылын сүрүн спонсор, кыайыылаахха бирииһин 3 төгүл улаатыннарда – 3 мөл. солк. Ону тэҥэ Дьокуускай куорат Олохтоох дьаһалтата кыайыылаахха – УАЗ “Патриот” массыынаны, үрүҥ көмүс призерга – “LADA Niva Travel” массыынаны, оттон үһүс миэстэни ылбыкка “Regulmoto” матасыыкыл бирииһи туруорда! Маны таһынан көрүҥнэргэ бастыҥ көрдөрүүлээхтэргэ биирдиилээн спонсордартан анал бириистэр баар буолуохтарын Эдуард Ефимов иһитиннэрдэ.

Сэрэбиэйдээһини бастаан Үс Хатыҥҥа ыһыах кэмигэр ыытыллар оҕолорго аналлаах өрөспүүбүлүкэтээҕи “Бэргэн оонньууларын” кыттыылаахтара тартылар. Санатар буоллахха, бу оонньуу былырыын бастакытын ыытыллан, көрөөччү киэҥ сэҥээриитин ылбыта.

Оттон сүүмэрдээһини ааһан быйылгы “Дыгын оонньууларыгар” кыттар чиэскэ тиксибит 16 спортсмен алта көрүҥҥэ сэрэбиэйи тарта.

Сэрэбиэй хайдах түспүтүн салгыы табылыыссаҕа көрөбүт.

Хаартыскалар: Ааптар түһэриилэрэ