Дыгын оонньуларын кыайыылааҕа кыбартыыра уонна үс мөлүйүөн харчы ылыаҕа

Тэрийээччилэр киин куорат олохтоохторугар уонна ыалдьыттарыгар 100-тэн тахса тэрээһини бэлэмнээтилэр, ол иһигэр сиэр-туом ыытыллыыта, кэнсиэрдэр, күрэхтэһиилэр, быыстапкалар, ат сүүрдүүлэрэ уонна бырагыраама сүрүн тэрээһинэ — дьон интэриэһин тардар «Дыгын оонньуулара» күрэҕи.

“Дыгын оонньууларын” кыайыылааҕа спонсор “СК-Строй” ХЭТ биир хостоох кыбартыыраны уонна генеральнай спонсор “Прогресс” ХЭТ 3 мөлүйүөн харчынан бирииһи ылыаҕа. Миэстэлэспиттэргэ эмиэ наҕараадалар туттарыллыахтара.

Дьокуускай баһылыга Евгений Григорьев бэрэссэдээтэллээх мунньахха бырааһынньык тэрээһинигэр сыһыаннаах боппуруостар ырытылыннылар: сири-уоту тупсарыыга уонна тырааныспар өҥөлөрүттэн саҕалаан куттал суох буолуутугар уонна сибээскэ тиийэ. Мунньах түмүгүнэн ыйыллыбыт болдьох иһигэр ирдэнэр үлэни толорорго сорудах бэрилиннэ.