«Дьулуруйар Ньургун Боотур» пааматынньык тутуллар кыаҕа улааппыт

Мунньах түмүгүнэн боротокуолга Куорат тутуутун уонна архитектуратын департамена бу дьыл бэс ыйын 30 күнүгэр диэри Владимировка аттынааҕы үрдэли тупсаран оҥоруу докумуоннарын ирдэбилгэ эппиэттэһэр гына оҥоруохтааҕа этиллэр.
Оттон Сир сыһыаннаһыыларыгар ааҕыныстыба «Дьулуруйар Ньургун Боотур» мэҥэ тааһы оҥорууну  көҕүлүүр Д.В. Федотов салайааччылаах бөлөҕү учаастак кыраныыссатын быһааран баран, бу дьыл  атырдьах ыйын 28 күнүгэр диэри мэҥэ таастаах паарка буолуохтаах сир Хатас нэһилиэгэр сыһыарылларын ситиһиэхтээх.

Бырайыагы көҕүлүүр бөлөх мэҥэ тааһы оҥорууга 3-тэн итэҕэһэ суох кэмиэрчэскэй этиини уонна пааматынньык турар сирин-уотун тупсаран оҥоруу дизайн-бырайыагын бэлэмнээн, от ыйын 31 күнүгэр диэри туттарыахтаах.
Бырайыагы көҕүлээччилэргэ бу паарканы 2027 сыллааҕы «Куорат эйгэтин оҥоруу» муниципальнай бырагыраамаҕа хапсан, куоластааһыҥҥа киирсиэхтэрин сөбүн бэлиэтээбиттэр. Ону тэҥэ бүддьүөтү таһынан источниктан үбүлээһини булан, бырайыагы олоххо киллэрэр туһунан толкуйдуурга сүбэлээбиттэр.
Куорат тутуутун уонна архитектуратын департаменыгар бу дьыл алтынньы ыйын 30 күнүгэр диэри «Дьулуруйар Ньургун Боотур» скульптураны оҥорууга кэмиэрчэскэй этиилэри хомуйан, 2027 сыллааҕы бүддьүөт сайаапкатыгар киллэрэригэр этиллибит.

Бырайыак көҕүлээччитэ, Сунтаар улууһун Бордоҥ нэһилиэгин бочуоттаах олохтооҕо Дмитрий Васильевич Федотов:
– Ньургун Боотурга мэҥэ бэлиэни туруорсан үлэлээбиппит 3-с сылыгар, дьэ, боппуруоспут оннуттан сыҕарыйда. Сирин булбуппут кэннэ, аны кимиэхэ сыһыарабыт диэн ыйытык турбута. Онно, хата, Хатас нэһилиэгин баһылыга Е.П. Пермяков сөбүлэһэн, Хатаска сыһыарылынна. Тоҕо диэтэххэ, ити сир – төрүкү да Хатас сирэгэр киирсэрэ.
Онон бырайыакпыт орун-оннун булан, оҥкула оҥоһулунна. Мантан салгыы боротокуолга суруллубутун курдук үлэни саҕалыыбыт.
– Мэҥэ таас бигэргэммит эбэтэр быһа барыллаан оҥоһуллубут эскииһэ баар буоллаҕа дии? Көрбүт киһи.
– Ол баар, оҥоһуллубута. Форэскиз диэн ааттанар. Мэҥэ таас дьэбин сиэбэт ыстаал көрүҥүттэн оҥоһуллуохтаах. Бастаан утаа ускуустубаннай таастан буолара ордуга дуу диэн баран, олус ыарахан ыйааһыннаах буолсу диэн тохтообуппут. Форэскииһин СӨ Үтүөлээх үлэһитэ, худуоһунньук, РФ худуоһунньуктарын сойууһун чилиэнэ Федот Макаров оҥорбута. Мэҥэ таас булгунньах үрдүгэр туруохтаах.
– Көстүүлээх, үрдүк сиргэ күн уотугар ыраахтан кылбайан турара көрүөххэ, саныахха да олус кэрэ буолсу! Ситиһиилэри!