«Дублер күнүн» кыттыылаахтара үлэлииргэ бэлэмнэр!

Олохтоох бэйэни салайыныы күнүн көрсө куорат баһылыга Евгений Григорьев «Дублер күнэ» тэрээһин кыттыылаахтарын кытта көрүстэ.
Ол курдук, Дьокуускай куорат дьаһалтатыгар ыытыллаары турар «Дублер күнүгэр» куорат баһылыга Евгений Григорьев эбээһинэһин толорор эппиэттээх уонна саамай уустук үлэ Саха-корейскай оскуола 10-с кылааһын үөрэнээччитэ Роман Хайдуровка сүктэрилиннэ.
6 №-дээх оскуола 11-с кылааһын үөрэнээччитэ Эркин Исаков – баһылыгы куорат уокуругун сайыннарыы боппуруостарыгар солбуйааччы Антон Алексеенко, 2 №-дээх оскуола 8-с кылааһын үөрэнээччитэ Денис Константинов куорат баһылыгын хаһаайыстыба боппуруостарыгар солбуйааччы Владислав Слепцов, Саха гимназиятын 11-с кылааһын үөрэнээччитэ Дьулустан Корнилов баһылыгы суол, тырааныспар, эргиэн, тыа хаһаайыстыбатын боппуруостарыгар солбуйааччы Владимир Дорожкин, 31 №-дээх оскуола 10-с кылааһын үөрэнээччитэ Павел Ножнинов баһылыгы социальнай боппуруостарга солбуйааччы Владимир Аржаков, 8 №-дээх оскуола 10-с кылааһын үөрэнээччитэ Милена Архипова Олохтоох дьаһалта аппараатын салайааччыта – куорат баһылыгын солбуйааччы Руслан Тимофеев дублердарынан ананнылар.
Бу күн Олохтоох дьаһалта структураларын, уокуруктар салайааччыларын эмиэ куорат оскуолаларын үөрэнээччилэрэ солбуйуохтара. 
Дублер күнүн иитинэн оҕолор электроннай докумуон биир кэлим тиһигин (ЕСЭД) кытта билсиэхтэрэ, настаабынньыктар сорудахтарынан тэрээһин боппуруостарынан дьарыктаныахтара, маны сэргэ Олохтоох дьаһалта күннээҕи үлэ-хамнас боппуруостарынан мунньахтарыгар кыттыыны ылыахтара.
«Дублер күнэ» оскуола үөрэнээччилэригэр куораты салайыы туһунан өйдөбүлү биэрэр, куорат уопсастыбаннай, экономическай, политическай олоҕун сэгэтэн биэрэр аналлаах, диэн иһитиннэрэр Олохтоох дьаһалта пресс-сулууспата.