Дойдутугар аҥаар атахтаах эргиллибит

1942 сыллаахха бэс ыйын 26 күнүгэр Ньурба оройуоннааҕы байыаннай комиссариатынан ыҥырыллан, Аҕа дойдуну көмүскүү барбыт. Хос эһэбит сэрии саамай уотун ортотугар сылдьыбыт. Стрелковай ротаҕа пулеметчигынан сулууспалаабыт.

Григорий Григорьевич Москва куораты босхолооһун күүстээх киирсиитигэр кыттыбыт. Сэриилэспит кэмнэрин улаханнык кэпсээбэт үһү. Ол кини дьоруойдуу быһыытынан арбана, кэпсэнэ сылдьыбатын, сахалыы сэмэй майгытын туоһута буоллаҕа.

Дьонум арай биир түгэни өйдөөн хаалбыттар. Уоттаах сэрии ортотугар өстөөх буулдьатыгар табыллан куотар, саһар сирэ суох буолбут. Ол иһин кыһалҕаттан өлбүт дьон өлүктэрин быыһыгар киирэн, саһан хаалбыт. Өстөөхтөр өлбүт дьон сыталлар диэн ааһа барбыттар. Инньэ гынан, хос эһэбит тыыннаах хаалбыт.

Сэриигэ сылдьан бэргэн ытааччы эбит. Ол туһунан «Кыым» хаһыакка биһиги хос эһэбитин хайҕаан суруйбуттар. Сэриигэ сылдьан иккитэ өстөөх буулдьатыгар таптаран, 1942 сыллаахха аҥаар атахтаах дойдутугар эргиллибит. Кэлээт, аҥаар атахтаахпын диэн олорботох. Кыайыы туһугар диэн пиэрмэҕэ күүстээх үлэҕэ туруммут. Быстарбыт атаҕыгар мас олордунар эбит уонна мас тайахтаах сылдьара үһү.

Григорий Григорьевич, бастыҥ снайпер буолан, «Хорсунун иһин» мэтээлинэн наҕараадаламмыт. Хомойуох иһин, ону илиитигэр туппатах. Бу мэтээл 1944 сыллаахха тохсунньу 10 күнүгэр анаммытын туһунан эһэбит сытан эмтэммит госпиталыгар баар докумуон туоһулуур. Сэрии кэннэ үлэлиир сылларыгар Сталин төбөлөөх мэтээлинэн, apaac хайҕал суруктарынан наҕараадаламмыт.

Ньургун Копырин,

Дьокуускай куорат 12-с №-дээх орто оскуолатын 6 «В» кылааһын үөрэнээччитэ