Дойдумсах буолуу олуктарын уурсаллар

«Ситим» айымньы дьиэтин кэлэктиибэ хаһан даҕаны буоларын курдук дьону-сэргэни, норуоту кытта бииргэ буолан, араас тэрээһиннэргэ кыттар даҕаны, тэрийэр даҕаны.

Биир оннук өйгө-санааҕа, дууһаҕа иҥэн хаалар түгэн б.дь. кулун тутар 15 күнүгэр Сайсары күөлгэ буолан ааста. Ол күн саха норуотун оспот бааһа буола сылдьар Улуу Ильмень күөлгэ буолбут түбэлтэни театрализованнай дьүһүйүүгэ сүүһүнэн дьон ортотугар «ситимнэр» Кыһыл Аармыйа саллааттара буолан киирдилэр. Биллэн турар, маннык тэрээһиннэргэ уһуйааччылар, учууталлар кыттыылара иитэр-үөрэтэр, уһуйар, угуйар суолтата сүҥкэн.

Дьылҕа хаан суруллубатах сокуонунан сылтан сыл аайы сэрии дуораанын, сут-кураан кыһалҕатын, уот сэрии абытайын эттэринэн-хааннарынан билбиттэр ахсааннара аҕыйыыр, ол эрээри уонунан сыллар тухары уостубатах аһыы-кутуу амтанын умнуо суохтаахпыт. «Уруккута суох билиҥҥи суох, ааспыта суох бүгүҥҥү суох» диэн уот харахха этии бүгүн даҕаны тоҕоостоох. «Ситимнэр» ССРС култууратын туйгуна, Хатас нэһилиэгин бочуоттаах олохтооҕо, Чурапчы көһөрүллүүтүн кыттыылааҕа Мария Васильевна Григорьевалыын чугастык, истиҥник алтыһаллар, тимуровскай көмө оҥороллор, ахтыы киэһэтин ыыталлар.

Кэлэктиип үлэтин биир сүрүн сыалынан оҕону дойдуга бэриниилээх буолууга иитии-үөрэтии, уһуйуу буолар. Манна «Бэтэрээннэргэ махталы, тапталы кытта» диэн көлүөнэ ситимин чиҥэтэр, дириҥэтэр социокултуурунай бырайыак үлэтэ олус тоҕоостоох. Бу бырайыак чэрчитинэн оҕолор Улуу Кыайыы күнүнэн бэтэрээннэргэ 765 аккырыыкканы оҥорон бэлэмнээтилэр. Маны таһынан нэһилиэк тэрилтэлэрин икки ардыларыгар тэриллибит бэстибээлгэ кыттан испэктээккэ да оонньоотулар, хоһоон-ырыа да эйгэтигэр киирдилэр.