«Дойдум дьоно дууһабар аанньал курдук ыалдьыттар...»

Дэлэҕэ, Яков Тыасытов тылларыгар, Исай Брызгалов дьүрүлүгэр «Дойдум дьоно дууһабар аанньал курдук ыалдьыттар»  ырыа бар дьон сүрэҕин сүүйүө, дууһаны-сүрэҕи долгута өрүкүтүө дуо?!

Ол курдук, ырыаҕа ылламмыт, хоһооҥҥо хоһуллубут «эдэр-эмэн дьоннордоох», «Элиэнньилиир уордьаннаах Элгээйилиир сопхуостаах», Олоҥхо дойдута Сунтаар Туойдаах Алаас туонатыттан тардыылаах Туймаада хочотун олохтоохторо кулун тутар 16 күнүн долгуйа-үөрэ күүтэбит.

Ити күн, бэнидиэнньиккэ, Өксөкүлээх Өлөксөй аатынан Норуоттар доҕордоһууларын киинигэр күнүс 14 чаастан күүтүүлээх тэрээһин буолуоҕа. Тапталлаах Элгээйибит нэһилиэгэ  төрүттэммитэ 255 үбүлүөйдээх сылыгар сыһыаран, «Үүнэ-сайда, чэлгийэ-чэчирии, туругура, тупса тур, төрөөбүт дойдубут Элгээйибит» диэн тумулук этиилээх дьоро күн буолуоҕа.

Куоракка олохсуйбут биир дойдулаахтарын кытта анаан-минээн көрсө кэлээри, сүүһүнэн киһилээх дэлэгээссийэ бу күннэргэ ох курдук оҥосто, кустук курдук куоһана сылдьар.

«САНДАЛ СААСТЫЫ САНДААРА, ЭЛГЭЭЙИЛЭР ТҮМСЭЛЛЭР» кэнсиэр 17.00 ч. саҕаланыаҕа. Ол иннинэ биидьийэҕэ уһуллан үйэтийии, биир дойдулаахтардыын көрсүһүү үөрүүтэ, атыы-тутуу арааһа тэнийиэ.

Кэнсиэргэ кыттыахтара Элгээйибит талба талааннаахтара: «Кэрэ кэм», «Оһуор», «Домисольки» уонна эр дьон «Эрчимэн» ырыа ансаамбыллара, «Далбарай», «Нуурал» үҥкүү бөлөхтөрө, «Ийэ тыла» ааҕар бөлөх, Юлиана Кривошапкина – Дьүрүйээнэ, Дуолан Трофимов, Карина Попова, Григорий Попов, Зоя Соловьева «Алгыстаах доҕордоһуу» ансаамбыла, «Бриллианты Якутии» оҕо образцовай үҥкүү тыйаатыра, ырыа куттаах Макаровтар дьиэ кэргэн, ийэлээх уол Мария, Петр Поповтар, Анастасия Михайлова, Айта Крылова, Мария Федорова уо.д.а.

Кэнсиэри Тускулаана Горохова-Кобельянова уонна Григорий Гурьев иилээн-саҕалаан ыытыахтара. Үөрүүлээх тэрээһини үҥкүү-битии киэһэтэ түмүктүө.