Дойдуга эмп сыаната үрдээтэ

«Тыын суолталаах эмтэргэ (ЖНВЛП) сыана ортотунан +0,6% үрдээтэ, ол иһигэр лоперамид (+1,3%), водород перекиһэ (+1,2%), амброксол уонна омепразол (+1,1%), ацетилсалициловай кислота (+1,0%)», — диэн URA.RU Росстат статистикатын аҕалар.

Ону тэҥэ аскорбиновай кислота, аторвастатин, ибупрофен уонна панкреатин 0,8% үрдээтилэр. 0,7% — дротаверин, индапамид, хлоргексидин уонна эналаприл.

Ону кытта сорох мэдиссиинэ табаардарын уонна бэрэбээскилиир матырыйааллар сыаналара эмиэ үрдээтэ. Электроннай тонометрдар – 1,6%, баата – 1,5%, оттон кыраадыһы мээрэйдиир электроннай термометрдар уонна биинтэлэр 0,8% ыараатылар.

Тыын суолталаах испииһэккэ киирбэт эмтэр ортотунан 0,9% үрдээтилэр. Ордук улахан үрдээһин натрий метамизолыгар (+2,3%), активированнай чоххо (+2%), метилурацилга (+1,8%), кеторолакка (+1,7%) уонна цитрамоҥҥа (+1,6%) бэлиэтэннэ. Ону таһынан троксерутин, таурин, меновазин, левомеколь уонна валосердин ыараатылар.