Дойдуга бэриниилээх буолуу кыраттан саҕаланар

От ыйын 7 күнүгэр Дьокуускай куораттааҕы «Энергетик» оҕо сайыҥҥы лааҕырын базатыгар арыллыбыт «Воин» киин байыаннай-патриотическай лааҕырын «Время новых героев» бастакы симиэнэтэ үөрүүлээхтик түмүктэннэ.

Симиэнэ байыаннай-прикладной үөрэҕи ааспыт эдэр патриоттары түмтэ. Ол курдук оҕолор тактическай үөрүйэххэ дьарыктаннылар, анал байыаннай дьайыы кыттыылаахтарын кытта көрүстүлэр, араас аралдьытар тэрээһиннэргэ кыттыыны ыллылар. 
Биир умнуллубат тэрээһининэн «Дьокуускай куорат Дууматын модела» өй күрэҕэ буолла. Оҕолор парламентскай дебаттарга курдук куораты сайыннарыыга туһуланар санааларын этиннилэр, көҕүлээһиннэрин киллэрдилэр. Тэрээһин бочуоттаах ыалдьыта уонна эспиэрэ, Куорат дууматын дьокутаата Наталья Луковцева оонньуу кыайыылаахтарыгар дипломнары туттарда уонна махталын биллэрдэ. 

Оттон бастакы симиэнэни үөрүүлээхтик түмүктүүр тэрээһиҥҥэ Саха Өрөспүүбүлүкэтигр федеральнай инспектор э.т. Денис Диких уонна үөрэх миниистирин солбуйааччы Степан Степанов кыттан, тэрийээччилэргэ уонна педкэлэктиипкэ ыччаты иитиигэ уонна байыаннай-патриотическай хамсааһын сайдыытыгар кылааттарын иһин махтаннылар. 
«Время новых героев» симиэнэ «Воин» киин үтүө үгэстэрин салҕаан, ыччаты дьиссипилиинэҕэ, дойдуга бэриниилээх буола улаатарга иитэр, диэн Куорат дууматын пресс-сулууспата иһитиннэрэр. 
От ыйын 9 күнүттэн иккис симиэнэ арылынна.