“Дьоруойдар биһиги ортобутугар”

Кулун тутар 11 күнүгэр “Разговоры о важном” бырайыак чэрчитинэн “Айар уустар” креативнай индустрия колледжын декоративнай-прикладной искусствоҕа устудьуоннара Мииринэйтэн төрүттээх, 2024 с. ахсынньытыгар анал байыаннай дьайыыга Ийэ дойдутугар ытык иэһин төлүү сылдьан дьоруойдуу суох буолбут талааннаах эдэр муосчут Денис Ксенофонтов төрөппүттэрин кытта көрүстүлэр.  Денис ийэтэ Наталья Николаевна уола пластилинтан саҕалаан улаатан, чочуйар идэтэ сайдан, муоһунан уһаныы курдук сөбүлүүр уран дьарыгар хайдах кэлбитин кэпсээтэ. Ханна да анаан үөрэммэккэ, айылҕаттан бэриллибит талба талаанынан, сүрэҕин баҕатынан дьаныардаахтык үлэлээн Денис сэлии муоһун ураннык чочуйуу улахан маастара буолбута. 2017 с. муосчуттар норуоттар икки ардыларынааҕы бэстибээллэригэр кыттан “Дебют” анал аат 2-с истиэпэннээх лауреата ааты ылбыта. Кини аата «Косторезное искусство народов мира» кинигэҕэ киирэн үйэтийбитэ. Денис үлэлэрин аан дойду араас муннугуттан интэриниэт ситиминэн сакаастыыллара. Денис оҕо эрдэҕинэ аан бастаан Эрмитажка сылдьан дьоппуон омук миниатюрнай скульптураларын – нэцкэлэри – көрөн олус сөбүлээбитин Наталья Николаевна истиҥник ахтан кэпсиир.  Оччолорго ким таайан билиэй, инникитин кини талааннаах илиитинэн санааны өрүкүтэр мындырдык чочуллубут дьон, кыыл, көтөр быһыыларын, жанровай сценалары, стилизацияламмыт миниатюралары чочуйан таһаарыан...

2012 с. үлэлиир усулуобуйаны тэринэр соруктаах Денис ИП тэриммитэ. Тендери кыайан, судаарыстыба субсидиянан өйөбүлүн ылан Мииринэйгэ мастарыскыай арыммыта. Кэлин Дьокуускай куоракка көһөн кэлэн анал байыаннай дьайыыга баҕа өттүнэн барыар диэри бу дьарыгынан үлэлээбитэ. Анал байыаннай дьайыы буола турар сиригэр кинини рота хамандыырынан анаабыттара. 2024 с. ахсынньытыгар байыастар ытыалааһыҥҥа түбэспиттэрэ, тыыннарын толук ууран туран ытык исэтэрин толорбуттара. Кинилэр ортолоругар “Косторез” диэн позывнойдаах Денис Ксенофонтов баара... Буойун, сулууспалаах ытык иэһин толороругар бэйэни харыстаммакка көрдөрбүт эр санаатын, хорсун быһыытын иһин Денис Ксенофонтовы өлбүтүн кэннэ “Хорсун быһыы” уордьанынан наҕараадалаабыттара. “Сүрэх уоттааҕын тухары бэринимиэххэ наада”, – диэн Денис өрүү этэрэ. Ити эппитин курдук олоҕун олорбута, айбыта-чочуйбута, бэриммэккэ киирсибитэ. 

Денис төрөппүттэрэ уолларын чочуйбут үлэтин харыстабыллаахтык уура сыталлар. Бу көрсүһүүгэ сорох үлэлэрин устудьуоннарга көрдөрөөрү илдьэ кэлбиттэр. Муосчут, ювелир идэтин баһылаары сылдьар оҕолор оҥоһуктары, маастар хаартыскаларын, кинигэлэри олус сэргии, сөҕө-махтайа көрдүлэр. Тэрээһин уопсай хаартыскаҕа түһүүнэн түмүктэннэ.

Бу көрсүһүү “Дьоруойдар биһиги ортобутугар” бырайыак чэрчитинэн талааннаах эдэр маастар аатын үйэтитэр, ыччаты байыаннай-патриоттуу иитэр соруктаах ыытылынна.

Хаартыскалар: “Айар уустар” креативнай индустрия колледжын архыыбыттан